Tónlistarkonan Rihanna er komin með nýjan kærasta samkvæmt erlendu slúðurpressunni. Sá heppni er enginn annar en Hassan Jameel, viðskiptajöfur frá Sádi-Arabíu.
Hassan þessi er varaforseti og varastjórnarformaður fjölskyldufyrirtækisins Abdul Latif Jameel, sem veltir gríðarlegum fjármunum á hverju ári. Fyrirtækið á til dæmis umboð fyrir Toyota í Sádi-Arabíu. Jameel er því af mjög auðugri fjölskyldu, en auðæfi hennar eru metin á á einn og hálfan milljarð Bandaríkjadala, tæplega 160 þúsund milljónir króna.
Rihanna og Jameel hafa sést saman að undanförnu og náðust myndir af þeim í sundlaug á dögunum þar sem þau voru augljóslega innileg og ástfangin. Breska götublaðið The Sun hefur eftir heimildarmanni að Rihanna sé yfir sig ástfangin.
Það var afi Hassans, Abdul Latif Jameel, sem stofnaði fjölskyldufyrirtækið árið 1955 en á sama tíma eignaðist hann einkarétt á sölu Toyota-bifreiða í Sádi-Arabíu. Á þeim tíma var Toyota tiltölulega óþekkt vörumerki en vegur fyrirtækisins hefur vaxið mikið undanfarna áratugi og í dag er Toyota líklega þekktasti bílaframleiðandi heims.
