Bandaríski stórleikarinn Johnny Depp hefur beðist afsökunar á ummælum sem hann lét falla um Donald Trump Bandaríkjaforseta.

Ummælin sem um ræðir lét Depp falla á Glastonbury-hátíðinni, en hann spurði hóp áhorfenda: „Hvenær gerðist það síðast að leikari drap Bandaríkjaforseta?“ Depp var staddur á hátíðinni þar sem mynd hans, The Libertine frá árinu 2004, var meðal annars sýnd.

Áhorfandi úr sal spurði hvort hann gæti ekki boðið Donald Trump á sýninguna en Depp svaraði um hæl og lét meðal annars þessi ummæli falla. Sagði hann að Trump þyrfti á hjálp að halda.

Leikarinn hefur nú sent frá sér yfirlýsingu þar sem hann biðst afsökunar á ummælum sínum. Þau hafi verið ósmekkleg og um hafi verið að ræða illa ígrundaðan brandara. „Ég kom þessu ekki frá mér eins og ég ætlaði og ætlaði ekki að móðga neinn. Ég var bara að reyna að vera fyndinn.“

Forsvarsmenn innan Hvíta hússins voru fljótir að gagnrýna ummæli Depps og bentu á að Trump hefði ítrekað fordæmt ofbeldi.