Leikkonan og fyrirsætan Anita Pallenberg er látin, 73 ára gömul. Hún lék meðal annars í myndunum Barbarella með Jane Fonda, Candy með Marlon Brando og Richard Burton og Performance með Mick Jagger.

Pallenberg fæddist á Ítalíu en hélt til New York og gerðist fyrirsæta. Hún kynntist gítarleikara Rolling Stones, Brian Jones, og þau áttu í ástarsambandi í tvö ár en hún sleit því eftir að hann beitti hana ofbeldi. Hún hóf ástarsamband með öðrum meðlimi Rolling Stones, Keith Richard, og þau eignuðust saman þrjú börn. Yngsta barn þeirra, sonur, dó tíu vikna gamall úr lungnabólgu. Pallenberg sagði að lífsstíll Richards hefði ekki verið fjölskylduvænn en hann vakti allar nætur og svaf á kvöldin og var í umtalsverðri eiturlyfjaneyslu. Pallenberg og Richard skildu árið 1980 og ári seinna sagðist Richard enn elska hana.

Pallenberg þótti gríðarlega sterkur persónuleiki og harðákveðin. Þeir sem til þekkja segja að hún hefði haft mikil áhrif á alla meðlimi Rolling Stone sem fóru iðulega að hennar ráðum. Á þeim tíma var hún stundum kölluð sjötti meðlimur hljómsveitarinnar. Hún íhugaði á tímabili að skrifa ævisögu sína en hætti við þá ráðagerð og sagði að útgefendur vildu bara heyra sögur af Rolling Stones og sorgarsögur af Mick Jagger. Sterkar sögusagnir voru á kreiki um að hún hefði í stuttan tíma verið ástkona Jaggers en sjálf neitaði hún því.

Pallenberg var um tíma í mikilli eiturlyfjaneyslu en leitaði sér hjálpar og hætti jafnframt allri drykkju. Hún féll seinna en náði sér aftur á strik. Hún sótti reglulega AA-fundi.

Í viðtali árið 2016 sagði hún: „Ég er tilbúin að deyja. Ég er komin yfir sjötugt og hélt í alvöru ekki að ég myndi verða eldri en fertug.“