Álitsgjafar Sunday Times völdu á dögunum eitt hundrað rokk- og poppplötur sem þeir telja að allir hljóti að hafa dálæti á. Á listanum eru vitanlega frægustu listamenn á þessu sviði: Bob Dylan, Bítlarnir, Rolling Stones og Joni Michell, svo örfá nöfn séu nefnd. Ísland á tvo fulltrúa á listanum, Björk og Sigur Rós. Plata Bjarkar, Debut frá árinu 1993, er ein af þeim perlum sem álitsgjafar segja alla eiga að taka ástfóstri við. Platan er sögð gefa þeim sem á hana hlusta tilfinningu fyrir því fullkomna frelsi sem þeir sem standi á fjallstindi finni fyrir. Tónlistin á Ágætis byrjun, plötu Sigur Rósar frá árinu 1999, er sögð draga upp mynd af auðum þjóðvegum Íslands þar sem skyndilega megi koma auga á jökul.
Álitsgjafarnir vilja ekki fullyrða hver sé besta platan í flokki rokk- og popptónlistar en telja að Sgt. Pepper’s Lonely Hearts Club Band frá 1967 sé þar sigurstranglegust. Hún sé byltingarkennt listaverk og allar hljómsveitir hljóti að taka mið af henni enda hafi hver kynslóðin á fætur annarri fallið fyrir henni.
