Hugh Bonneville, sem þekktastur er fyrir leik sinn í Downton Abbey, mun leika rithöfundinn fræga, Roald Dahl, í nýrri kvikmynd. Dahl er höfundur fjölda klassískra barnabóka og má þar nefna Matthildu og Kalla og sælgætisgerðina. Myndin mun fjalla um hjónaband rithöfundarins og Óskarsverðlauna-leikkonunnar Patriciu Neal. Dahl og Neal gengu í hjónaband árið 1953 og eignuðust fimm börn. Ýmiss konar harmur sótti hjónin heim, fjögurra mánaða sonur þeirra slasaðist alvarlega þegar leigubíll ók á barnavagn sem hann var í. Sonurinn var tvö ár að jafna sig. Tveimur árum síðar dó sjö ára dóttir þeirra úr heilabólgu eftir að hafa fengið mislinga. Neal fékk heilablóðfall þremur árum síðar og var þá barnshafandi. Hún var í dái í þrjár vikur og þegar hún komst til meðvitundar þurfti hún að læra að ganga og tala á ný. Á þeim tíma var það eiginmaðurinn sem reyndist stoð hennar og stytta. Neal fæddi síðan heilbrigða dóttur. Hjónin skildu árið 1983 eftir að upp komst um framhjáhald Dahls.
Kvikmyndin mun fjalla um sigra og harmleiki í lífi tveggja frægra einstaklinga. Leikstjóri myndarinnar verður John Hay. Ekki hefur verið tilkynnt hver muni leika Patriciu Neal, en frétt þess efnis er að vænta á næstunni.
