Nýjasta mynd kvikmyndaseríunnar Fast and the Furious og sú áttunda í röðinni, The Fate of the Furious, er nú í sýningu í kvikmyndahúsum hér á landi, sem og erlendis. Myndin hefur fengið feiknagóðar viðtökur hjá kvikmyndaaðdáendum og þykir hafa endurvakið eiginleika fyrstu myndanna, en serían dalaði aðeins um miðbik hennar. Í FF8 ferðast hópurinn heimshorna á milli til að koma í veg fyrir hamfarir á heimsvísu.

Myndin er veisla fyrir aðdáendur flottra og hraðskreiðra bíla, fallegra sköllóttra manna og föngulegra kvenna. Sagan hefst á Kúbu og fyrsti kappaksturinn á sér stað í höfuðborginni Havana. Ljósmyndari blaðsins hefur margoft ferðast til Kúbu og fangað þar stemningu eyjunnar, sem hér getur að líta í máli og myndum. Það er um að gera fyrir kvikmyndaaðdáendur að skella sér í bíó með popp og kók og upplifa rússíbanaferð FF8 með eigin augum.

KELLURNAR Á KÚBU Hefðbundin eldri kona á Kúbu með vindil.

HEIMABAR HEMINGWAY Barinn La Floridita, þar sem rithöfundurinn Ernest Hemingway sat alla daga, drakk, borðaði og skrifaði, er mjög vinsæll meðal ferðamanna. Hemingway sagði að þar fengist heimsins besti daquiri. Barnum er haldið í upprunalegri mynd.

FJÖLSKYLDUFERÐ Veggspjald af byltingarmanninum Che Guevara trónir yfir fjölskyldu sem undirbýr sig fyrir bæjarferð á rússneskri vespu.

KABARETTKLÚBBURINN Kabarett- og næturklúbburinn Tropicana var opnaður 1939, mafían á Kúbu gerði hann síðar að sínum heimastað. Klúbburinn fékk að starfa alla tíð án afskipta Castro, fyrrverandi einræðisherra, og er í dag vel sóttur af ferðamönnum og léttir pyngju þeirra.

VANTAR ÞIG TAXA? Hér er Hreyfill Kúbumanna, glæsilegur og forn leigubílafloti.

DÆMIGERÐ GÖTUMYND Götumynd á Kúbu, með Chevrolet 59 í forgrunni.

FÖNGULEGT FLJÓÐ Í flestum kappaksturssenum í kvikmyndum má sjá fallega stúlku sem lyftir upp klút og lætur hann síðan falla þegar keyrt er af stað.

SKRIÐDREKI CASTRO Í bakgrunni má sjá skriðdrekann sem Castro keyrði inn í Havana þegar hann tók völd á Kúbu og steypti þáverandi forseta, Fulgencio Batista, af stóli.

EINKENNI KÚBU Föngulegt fljóð og flottur eðalvagn.