Frá Kensingtonhöll barst nýlega sú tilkynning að Georg prins myndi hefja skólagöngu sína næstkomandi haust. Litli prinsinn fer í fínan skóla í Suður-London. Þar eru nemendur rúmlega 500 á aldrinum fjögurra til þrettán ára og af báðum kynjum. Á meðal þess sem prinsinn mun læra er ballett, tónlist, leiklist og listasaga. Í skólanum er lögð mikil áhersla á gildi eins og góðvild, kurteisi, auðmýkt og örlæti. Skólastjórinn er mikill andstæðingur þess að keppnisandi ríki í skólum.

Katrín hertogaynja, móðir Georgs, sagði nýlega að foreldrar hennar hefðu kennt henni mikilvægi þess að sýna öðrum góðvild og virðingu og vera heiðarlegur. „Þess vegna viljum við Vilhjálmur kenna börnum okkar, Georg og Karlottu, hversu mikilvægir þessir eiginleikar eru. Mér finnst þeir alveg eins mikilvægir og að ná árangri í reikningi eða íþróttum,“ sagði Katrín.

Georg litli þykir mikil krúttbomba. Hann er stundum kallaður „Lýðveldisbaninn“, því hann bræðir hjörtu allra, líka þeirra sem afnema vilja konungdæmið. Hann verður fjögurra ára gamall í júlí.