Nýjustu tíðindi frá Hollywood herma að stjörnupartið Katy Perry og Orlando Bloom séu hætt saman eftir eins árs ástarsamband. Þetta staðfestir talsmaður parsins við US Weekly en fréttirnar koma sem þruma úr heiðskíru lofti fyrir aðdáendur stjarnanna. Turtildúfurnar mættu saman á nýliðna Óskarsverðlaunahátíð og virtust geisla af hamingju í Vanity Fair-partýinu. Þá birti Orlando mynd af sér og Butters, hundi Katy, síðastliðinn mánudag .

Fyrir tæpum mánuði síðan kom Katy ástmanni sínum á óvart með því að skipuleggja lúxusfrí í Palm Springs í tilefni fertugsafmælis leikarans. Þá flaug hún móður Orlando, Soniu, á staðinn í tilefni tímamótanna.
„Áður en að Gróa á Leiti fer á stjá þá getum við staðfest að Katy og Orlando hafa ákveðið að veita hvort öðru svigrúm í óákveðin tíma,“ sagði talsmaðurinn.
Stjörnurnar hófu að draga sig saman í mars á síðasta ári og því varði sambandið í tæpt ár. Katy hefur áður verið í sambandi við söngvarann John Mayer sem og rapparann Travie McCoy. Þá var hún gift breska uppistandaranum Russell Brand á árunum 2010 til 2012.

Orlando Bloom var giftur ofurfyrirsætunni Miröndu Kerr árin 2010 til 2013 en þau eiga soninn Flynn saman sem er sex ára gamall.