Leikstjórinn James Cameron vinnur nú að nýrri Avatar-mynd. Hann segist ekki bara ætla að gera eina framhaldsmynd heldur nokkrar. Tökur á Avatar 2 hefjast í ágúst en leikstjórinn er einnig með Avatar 3, 4 og 5 á teikniborðinu og segir að handrit að þeim myndum séu tilbúinn. „Mér finnst ég vera sloppinn úr fangelsi því ég hef verið í skriftarhelli síðustu tvö árin,“ sagði hann nýlega í viðtali.

Leikarar í Avatar 2 verða þeir sömu og í hinni frægu verðlaunamynd leikstjórans: Zoe Saldana, Sam Worthington og Sigourney Weaver. Weaver segist hafa lesið handrit framhaldsmyndanna, fyrir utan það fimmta, og þar sé kafað mun dýpra en í fyrstu myndinni.

Fyrsta Avatar myndin var frumsýnd árið 2009 og var tilnefnd til níu Óskarsverðlauna og vann til þrennra. Að margra mati átti hún skilið að hljóta verðlaun sem besta mynd og fyrir bestu leikstjórn, en það varð ekki. Myndin Hurt Locker var valin besta myndin og leikstjóri hennar Kathryn Bigelow, keppti við Cameron, fyrrverandi eiginmann sinn, um leikstjóraverðlaunin. Bigelow vann og varð þar með fyrsta konan til að hreppa Óskarsverðlaun fyrir leikstjórn á mynd í fullri lengd. Sigourney Weaver sagði seinna að úrslitin hefðu ráðist vegna kynferðis, Cameron hefði átt að vinna en hefði tapað vegna þess að hann væri ekki með brjóst.