Leikarinn Bill Paxton lést nýlega 61 árs gamall vegna fylgikvilla eftir skurðaðgerð. Meðal þekktustu mynda hans eru The Terminator, Aliens, True Lies, Apollo 13 og Titanic. Paxton lék einnig í sjónvarpsþáttum og var tilnefndur til Emmy-verðlauna fyrir leik sinn í einum slíkum, Hatfield & McCoys. Hann leikstýrði nokkrum myndum á farsælum ferli. Eftir á að frumsýna myndina The Circle þar sem Paxton lék á móti Tom Hanks og Emmu Watson.

Þegar Paxton var átta ára gamall var hann í mannfjöldanum sem fagnaði John F. Kennedy forseta þegar hann gekk út úr hóteli í Texas daginn sem hann var myrtur. Til er ljósmynd sem sýnir þegar hinum unga Paxton er lyft upp svo hann geti séð forsetann. Myndin er til sýnis á safni í Texas. Seinna var Paxton þulur í heimildamynd þar sem fjallað var um þennan mikla örlagadag. Paxton mundi vel eftir að hafa séð Kennedy og sagði: „Hann hefði ekki getað verið meira heillandi.“

Árið 1988 gaf Paxton út plötu ásamt vini sínum og James Cameron leikstýrði tónlistarmyndbandi með söng þeirra. Cameron og Paxton voru nánir vinir en leikstjórinn leikstýrði Paxton í hinum frægu myndum The Terminator, True Lies, Aliens og Titanic. Cameron sagði í yfirlýsingu eftir lát Paxton að veröldin væri ekki söm nú þegar hann væri fallinn frá og sagði hann hafa verið stórbrotinn mann.

Paxton kvæntist seinni eiginkonu sinni árið 1987 og þau eignuðust tvö börn.