Meryl Streep sagði nýlega að hún hefði ekki átt annars kost en að gagnrýna Donald Trump á Golden Globe-hátíðinni í janúar síðastliðnum. Þá tók leikkonan við verðlaunum fyrir leik sinn í Florence Foster Jenkins og hélt þar ræðu sem vakti gríðarlega athygli en þar talað hún af hörku um Donald Trump og ræddi sérstaklega um það þegar hann hæddist að fötluðum fréttamanni. Í síðustu viku í ræðu hjá mannréttindasamtökum í New York sagðist Streep hafa orði fyrir árásum brúnstakka vegna gagnrýni sinnar á Trump. Hún útskýrði þó ekki um hvaða hóp væri að ræða, en víst er að hún hefur eignast stóran óvinahóp vegna harðrar gagnrýni á forsetann.
Í ræðunni í New York sagðist hún hafa fundið fyrir ótta við að tala gegn Trump og hún hefði heldur viljað vera heima að setja í uppþvottavélina. Hún hefði þó ekki getað annað en tjáð pólitískar skoðanir sínar. „Ef við lifum af þessa óvissutíma, ef þessi skelfilega þörf fyrir að hefna sín leiðir okkur ekki út í kjarnorkuvetur, þá getum við þakkað forsetanum ýmislegt. Þá hefur hann vakið okkur til meðvitundar um það hversu brothætt frelsið er,“ sagði Streep. Hún vitnaði í hin fleygu orð: „Það eina sem þarf til að hið illa sigri er að góðir menn geri ekkert“, og bætti við: „Allir hafa rétt til lífs, frelsis og þess að leita hamingjunnar.“
