Þau tókust öll á árinu með einum eða öðrum hætti. Sindra Sindrasyni og Töru Margréti lenti saman í sjónvarpssal. Margrét Friðriksdóttir og Sema Erla hafa tekist á í fjölmiðlum. Þá er ekki kært með Vilhjálmi Birgissyni og Gylfa Arnbjörnssyni. Það sama má segja um Loga Einarsson og Snorra í Betel en sá síðarnefndi hefur gagnrýnt formann Samfylkingarinnar og telur að hann hafi haft úrslitáhrif á að Snorri var rekinn úr kennarastarfi á Akureyri. Síðan eru það Frosti Logason, stjórnandi Harmageddon, og Hildur Eir Bolladóttir prestur, en parið er ósammála um margt er varðar trúmál.

En hvað myndu þau gefa hvort öðru í jólagjöf ef þau yrðu neydd til þess pakka inn gjöf fyrir hvort annað?

Tara Margrét gefur Sindra Sindrasyni:

Mér finnst skemmtilegast að gefa upplifun sem hvetur viðtakandann til að stíga út fyrir þægindarammann sinn. Ætli ég myndi því ekki gefa Sindra gjafabréf í Ikea.

Sindri gefur Töru:

Ekki bara myndi ég, heldur ætla ég að gefa Töru, vinkonu minni, það sem alla langar mest í um jólin, fjögurra klukkustunda einkatúr um uppáhaldsverslunina mína Epal. Um er að ræða skoðunarferð á fræðilegum nótum þar sem ég fer afar vandlega yfir sögu hvers og eins hönnuðar en auðvitað er líka um skemmtiferð að ræða. Í lokin myndi ég svo leyfa henni að velja sér einn fallegan hlut enda á ekkert íslenskt heimili að vera án vöru frá Epal.

Kveðja, Epalhomminn.

Margrét Friðriksdóttir gefur Semu Erlu:

Ég hugsa ég myndi gefa henni hjartalaga konfektkassa og láta jólakort fylgja með sem stæði í Kæra Sema þú ert ágæt, verum góð við hvort annað, Gleðileg jól, ást og friður Margrét.

Sema Erla gefur Margréti:

Ef ég ætti að gefa Margréti Friðriksdóttur jólagjöf myndi ég gefa henni bókina Njóttu lífsins eftir Unni Arngrímsdóttur en bókin fjallar um mannasiði og leiðbeiningar í mannlegum samskiptum. Ég myndi einnig gefa henni eintak af heimildamynd Ai Weiwei, Human Flow, sem segir á átakanlegan hátt frá fólki á flótta um allan heim. Svo myndi ég auðvitað gefa henni krukku fulla af kærleik, hamingju og almennri skynsemi.

Vilhjálmur Birgisson gefur Gylfa Arnbjörnssyni

Varðandi gjöfina til forseta ASÍ þá myndi ég gefa honum bókina um ævi Guðmundar J. Guðmundssonar (Gvend jaka). Ég held að forseti ASÍ myndi geta lært töluvert um hvernig alvöru verkalýðsbarátta þarf að vera til að ná árangri fyrir þá sem höllustum fæti standa með því að lesa þá bók.

Gylfi Arnbjörnsson – ekki náðist í Gylfa.

Frosti Logason gefur Hildi Eiri Bolladóttur

Stórvinkonu minni Hildi Eiri Bolladóttur mundi ég fyrst og fremst vilja gefa óskir um einstaklega friðsæl jól og farsælt komandi ár. Síðan mundi ég gauka að henni einum DVD-disk með söngkonunni Mahaliu Jackson að syngja Amazing Grace og öðrum með kvikmyndinni Love Actually sem ég veit að kemur Hildi Eiri alltaf í gott jólaskap. Að lokum mundi ég svo velja handa henni einhverja allra bestu jólabók sem hægt er að hugsa sér en það er bókin A Letter to a Christian Nation eftir bandaríska höfundinn Sam Harris. Hann er persónulega einn af mínum uppáhaldshöfundum og það dugir ekkert minna fyrir vinkonu mína. Þar skrifar Harris eins konar opið bréf til kristinna manna sem er góð hugvekja fyrir allt hugsandi fólk.

Hildur Eir gefur Frosta Logasyni:

Ég myndi gefa honum Frosta flugfar norður í land og sækja hann sjálf út á flugvöll og bjóða honum með mér í jólamessu í Akureyrarkirkju þar sem við myndum flytja samtalspredikun fyrir söfnuðinn um það að vera elskuverð í trú okkar sem og trúleysi. Síðan myndi ég bjóða honum í Brynjuís og aka honum aftur út á völl og kveðja hann með vinsemd og virðingu.

Snorri í Betel gefur Loga Einarssyni:

Frá því er greint í hinni helgu bók, Biblíunni, sem telst af sumum hættuleg börnum: „Augað er lampi líkamans; ef því auga þitt er heilt þá mun allur líkami þinn vera í birtu; en sé auga þitt sjúkt þá mun allur líkami þinn vera í myrkri.“ Myrkur, lygar og blekkingar eru notuð yfir sama fyrirbærið. Logi gerði sig sekan um blekkingar og lygar á Bylgjunni þegar hann neitaði aðkomu að minni uppsögn þó bókun skólanefndar hafi legið fyrir undanfarin fimm ár! Ég væri til í að gefa honum gleraugu sannleikans! Gæti byrjað með því að gefa honum gömlu gleraugun mín svo hann gæti séð veruleikann með „mínum augum“! Þá gæti hann yfirgefið blekkingar sósíalismans og ofstjórnartilburði hans. Augljóst er öllum með heilbrigða sýn að við megum ekki framganga í fláttskap né fölsun Guðs orðs! Gleðileg jól.

Logi Einarsson afþakkaði að gefa Snorra gjöf.