Það eru brátt liðin fjögur ár frá því að bandaríski leikarinn Philip Seymour Hoffman lést. Mimi O‘Donnell, barnsmóðir og unnusta Hoffmans til fjórtán ára, minnist hans í athyglisverðri grein í tímaritinu Vogue þar sem hún fer yfir aðdraganda þess að Hoffman féll á áfengis- og fíkniefnabindindi sínu.

Mimi og Philip voru saman á árunum 1999 til 2013 og áttu þau þrjú börn saman. Hún segir að Philip hafi aldrei farið í grafgötur með það að hann hafi glímt við áfengis- og eiturlyfjafíkn á sínum yngri árum. Raunar hafi hann talað opinskátt um þann vanda og verið meðvitaður um hann, en með viljann að vopni hafi hann haldist edrú í 20 ár áður en fór að síga á ógæfuhliðina.

„Ég sá fyrstu merki þess þegar Phil sagði við mig, upp úr þurru, að hann væri að velta fyrir sér að smakka áfengi á nýjan leik. Hann spurði mig hvað mér fyndist um það.“ Mimi segist hafa verið mótfallin því en Philip samt sem áður byrjað að drekka aftur.

Drykkjan varð fljótt meiri og meiri og áður en langt um leið var Philip farinn að misnota fíkniefni; ópíóíðalyf og heróín, en það var að lokum of stór skammtur af heróíni sem dró hann til dauða þann 2. febrúar 2014.

Í grein sinni segir Mimi að ekkert eitt sérstakt atvik hafi orðið til þess að Philip fetaði þessa ógæfubraut. Hún nefnir þó nokkra samverkandi þætti. Þannig hafi vinur hans til margra ára, einstaklingur sem Philip var í sálfræðimeðferð hjá, látist og dauði hans fengið mikið á hann. Þá hafi einhverjar deilur milli Philips og vina hans hjá AA-samtökunum haft neikvæð áhrif á sálarlíf hans, aukin frægð og frami og mikið vinnuálag.

Þegar Mimi sá að í óefni var komið biðlaði hún til Philips að hann myndi flytja í eigin íbúð. Þetta var árið 2013. Taldi hún að ástand hans myndi hafa skemmandi áhrif á börn þeirra. Hún segir að Philip hafi verið tíðrætt um að ná sér á strik aftur, hann hafi viljað hætta neyslunni en ekki getað það.

Nú þegar fjögur ár eru brátt liðin frá dauða hans segir Mimi að hún og börn þeirra tali stanslaust um hann. Nú geti þau talað um hann án þess að gráta í hvert einasta skipti sem nafn hans ber á góma.