Ringo Starr fagnaði 77 ára afmæli sínu á dögunum. Hann sendi nýlega frá sér plötu, Give More Love, og í tveimur laganna leikur Paul McCartney á bassagítar. Þeir félagar halda enn vináttu. Ringo segir að þeir sitji hins vegar ekki saman og tali um að nú séu bara þeir tveir eftir af Bítlunum.

Ringo segist sakna John Lennon og George Harrison. Hann segir að kynnin af John, George og Paul hafi verið eins og að eignast bræður. „Við þekktumst svo vel. Við bjuggum saman. Við pössuðum upp á hver annan og studdum hver annan. Og rifumst.“ Af öllum plötum Bítlanna segist Ringo vera stoltastur af Hvíta albúminu, þar hafi þeir félagar verið að gera það sem þeir gerðu best.

Olivia Harrison, ekkja George Harrison, fann nýlega gamlan texta lags sem heitir Hey Ringo sem Harrison samdi um félaga sinn. Hún lét ramma textann inn og gaf Ringo sem segist hafa komist við. Í textanum er að finna orðin: „Ringo, ég vil að þú vitir að án þín leikur gítarinn mun hægar.“ Ringo var við sjúkrabeð Harrison í Sviss á síðustu vikunum sem hann lifði.

Ringo er grænmetisæta og hugleiðir á hverjum degi. Hann hefur verið kvæntur leikkonunni Barböru Bach síðan 1981.