Leikarinn George Clooney var á dögunum í viðtali við The Hollywood Reporter. Þar var komið víða við og meðal annars rætt um kunningskap leikarans og Baracks Obama, en forsetinn fyrrverandi hefur heimsótt leikarann í London og dvaldi á heimili hans í sólarhring ásamt hópi öryggisvarða. Í viðtalinu kom einnig fram að Clooney og Obama skiptast á sms-skilaboðum.

Í viðtalinu, sem tekið var á heimili leikarans á Ítalíu, var mest rætt um einkalíf hans. Clooney segir að á árum áður hafi hann oft fundið fyrir einmanakennd. Hann þjáðist einnig af miklum bak- og höfuðverkjum eftir fall við kvikmyndatöku á Syriana. Hann fór í nokkrar bakaðgerðir sem tókust vel og finnur nú lítið fyrir verkjum. Hann þjáðist einnig af svefnleysi, sem hann hefur nú læknast af.

Hann segir að gjörbreyting hafi orðið á lífi hans þegar hann kynntist konu sinni, Amal. „Skyndilega verður líf annarrar manneskju mikilvægara en þitt eigið. Mér finnst leitt að ég var rúmlega fimmtugur þegar ég fann hinn fullkomna lífsförunaut, en þá bara vegna þess að ég vildi hafa átt meiri tíma með henni.“

Hjónunum fæddust tvíburar í júní og Clooney segist vera orðinn snillingur í að skipta um bleyjur. Þeir sem séð hafa tvíburana segja þá vera ótrúlega fallega og sjarmerandi – eins og foreldrarnir sannarlega eru.