Í þessum mánuði og þeim næsta verða áhugaverðar kvikmyndir frumsýndar vestanhafs og rata væntanlega fljótlega til íslenskra kvikmyndahúsgesta. Hér er sagt frá nokkrum þeirra.
It It er ein af bestu skáldsögum Stephen King. Þar segir frá börnum sem komast í kynni við hryllingsveru. Bill Skarsgaard, Jaeden Lieberher og Finn Wolfhard fara með aðalhlutverkin. Til stendur að gera síðan framhaldsmynd.
Mother Óskarsverðlaunaleikkonan Jennifer Lawrence fer með aðalhlutverkið í sálfræðitrylli sem leikstýrt er af Darren Aronofsky, sem er unnusti hennar. Í öðrum hlutverkum er sannkallað hæfileikafólk: Javier Bardem, Ed Harris og Michelle Pfeiffer. Jóhann Jóhannsson er höfundur tónlistarinnar. Myndin segir frá hjónum sem finnst tilveru sinni ógnað þegar þau kynnast dularfullu pari.
The Snowman Michael Fassbender bregður sér í hlutverk Harry Hole í mynd sem gerð er eftir sögu Jo Nesbö, Snjókarlinum. Rebecca Ferguson, Val Kilmer, Chloe Sevigny, Charlotte Gainsborough og J.K. Simmons eru meðal annarra leikara.
Suburbicon George Clooney leikstýrir glæpa-gamanmyndinni Suburbicon sem er meðal mynda sem sýndar eru á Feneyjakvikmyndahátíðinni og fer síðan í almenna sýningu. Meðal leikara er Julianne Moore, sem hér sést með Clooney í Feneyjum. Aðrir leikarar eru Matt Damon og Oscar Isaac. Coen-bræður eru handritshöfundar.
The Mountain Between US Idris Elba og Kate Winslet eru ferðalangar sem lifa af flugslys en eru föst í óbyggðum um vetur. Myndin er byggð á samnefndri metsölubók. Beau Bridges og Dermot Mulroney eru einnig meðal leikenda.
The Killing of the Sacred Deer Colin Farrell og Nicole Kidman léku saman í myndinni Beguiled og leiða aftur saman hesta sína í nýjum sálfræðitrylli. Skurðlæknir þarf að færa ótrúlega fórn eftir að andlegri heilsu konu hans hrakar og ungur drengur sem hann hefur tekið undir verndarvæng sinn fer að sýna ógnvænlega hegðun.
