Gat ekki rétt úr höndunum tíu dögum eftir mót – Andlega hliðin mikilvæg
Annie Mist Þórisdóttir endaði í þriðja sæti á Heimsleikunum í crossfit sem fram fóru í byrjun mánaðarins. Þetta er í níunda skiptið sem Annie tekur þátt í leikunum og í fimmta skiptið sem hún endar á verðlaunapalli. Í einlægu viðtali ræðir Annie um íþróttina sem hún elskar, hvernig hún slökkti á efasemdaröddunum sem töldu hana búna, meiðslin og sálarlífið, umræðuna um steranotkun sem hún segir bæði sorglega og leiðinlega og ástina sem hún fann í crossfit.
Hér að neðan birtist brot úr viðtalinu en þar ræðir hún meðal annars um erfiðleika sem hún gekk í gegnum árið 2015.
Annie Mist er sá íþróttamaður sem kom crossfit á kortið á Íslandi. Hún varð fyrst kvenna til að verða tvöfaldur heimsmeistari, árin 2011 og 2012, lenti í öðru sæti 2010 og 2014 en keppti ekki vegna bakmeiðsla 2013. Árið 2015 fékk hún alvarlegt hitaslag sem hafði það mikil áhrif á líkama hennar að hún varð að draga sig úr keppni. Ári seinna mætti hún í toppformi líkamlega en þar sem hún hafði ekki unnið í andlegu hliðinni eftir hitaslagið gekk henni ekki sem skyldi og endaði í 13. sæti.
Annie viðurkennir að frábært gengi hennar í ár hafi eflaust komið einhverjum á óvart. „Ég held að margir hafi afskrifað mig – einhverjir héldu jafnvel að ég væri orðin of gömul. Sjálf vissi ég að ég væri ekki búin og notaði efasemdaraddirnar til þess að hvetja mig áfram og sýna og sanna að ég væri enn á meðal þeirra bestu. Ég vissi það alltaf. Ég var í frábæru líkamlegu formi 2015, þegar ég fékk hitaslagið, og var bara alls ekki tilbúin í fyrra. Þá varð ég hrædd við sólina og hitann og slæmu minningarnar streymdu til mín.“
Hún segir andlegu hliðina gífurlega mikilvæga í crossfit. „Ég hef alltaf trúað því að hausinn myndi gefast upp á undan líkamanum og með því hugarfari hef ég farið í gegnum æfingarnar. Árið 2015 var það öfugt; hausinn var tilbúinn en líkaminn brást mér. Ég hef aldrei upplifað það áður. Mér hefur aldrei liðið eins illa líkamlega, og tíu dögum eftir mótið gat ég enn ekki rétt úr höndunum. En svo jafnaði ég mig smám saman og hafði náð sama styrk tveimur, þremur mánuðum seinna. Ég vissi alltaf að þetta myndi lagast en var samt hrædd um að hafa skemmt eitthvað. Þetta tók óþægilega langan tíma,“ segir hún og bætir við að bakmeiðslin í kringum 2013 einnig hafa reynt á sálarlífið. „Þá hélt ég að ég væri búin – að ég gæti aldrei keppt í crossfit aftur. Ég held að ég hafi ekki gert mér grein fyrir því hvað ég naut þess svakalega að æfa fyrr en ég hélt að ég gæti það ekki lengur.“