Forbes-tímaritið hefur gefið út lista yfir tekjuhæstu leikkonur Hollywood á síðustu tólf mánuðum. Á listanum kennir ýmissa grasa en í efsta sæti situr Óskarsverðlaunaleikkonan Emma Stone.
Listinn tekur til tólf mánaða tímabils, frá júní 2016 til júní 2017, en á þessu tímabili áætlar Forbes að Emma hafi þénað 26 milljónir Bandaríkjadala, 2,8 milljarða króna. Þessar miklu tekjur má að stærstum hluta rekja til velgengni La La Land, en Emma fór með aðalhlutverk myndarinnar ásamt Ryan Gosling. Hún hlaut Óskarinn sem besta leikkona í aðalhlutverki.
Þess má geta að á síðasta ári þénaði hún 10 milljónir dala og nemur tekjuaukningin því 160 prósentum á milli ára.
Jennifer Aniston er í öðru sæti listans með tekjur upp á 25,5 milljónir dala, rétt tæpa 2,8 milljarða. Í þriðja sætinu situr svo Jennifer Lawrence en hún var á toppi listans á síðasta ári og árið þar á undan. Tekjur hennar námu 24 milljónum dala, rúmum 2,6 milljörðum króna.
Aðrar leikkonur á topp tíu listanum voru Melissa McCarthy, Mila Kunis, Emma Watson, Charlize Theron, Cate Blanchett, Julia Roberts og Amy Adams.
