Frægar stjörnur, blóm og fleira farðað sem augnförðun
Emily Oliver er aðeins 15 ára og nýbyrjuð að munda förðunarburstann, en hæfileikar hennar fá marga þá sem eldri eru í bransanum til að blikna í samanburði. Sem augnförðun hefur hún meðal annars málað frægar stjörnur, persónur úr bókum og bíómyndum og blómabreiður.
Oliver er nemandi í Portland í Oregon og byrjaði að nota förðunarvörur þegar hún var 13 ára. Það var þó alveg í lágmarki, segir hún í viðtali við Buzzfeed, þar sem ekki var vel liðið að mæta förðuð í skólann. Í febrúar síðastliðnum fór hún að gera tilraunir með förðunarvörur fyrir alvöru og í dag segist hún vera alveg hugfangin af förðuninni.
Oliver dundaði sér bæði við að teikna og mála áður, en fann ástríðuna í förðuninni. Áhugasamir geta fylgst með henni á Twitter undir notandanafninu emilyslooks.
