Tenniskappinn og Wimbledon-meistarinn Jonn McEnroe segist stoltur af því að vera femínisti. Hann segir í viðtali við Sunday Times að það að eiga dætur hafi gert hann meðvitaðan um stöðu kvenna í íþróttaheiminum.

Hann segir fáránlegt að kvenkyns tennisleikarar fái lægri greiðslur en karlmennirnir. McEnroe, sem er orðinn 58 ára gamall, segist oft vera spurður um hvort honum finnist að atvinnukonur í tennis eigi að fá jafnmikið verðlaunafé og karlmenn þar sem tenniskeppni þeirra sé venjulegri styttri en karla. McEnroe á gott svar við þessu og segir: „Þótt kvikmynd sé þriggja og hálfs tíma löng jafngildir það ekki því að hún sé betri sem sú sem er níutíu mínútur.“

Seinna bindi sjálfsævisögu McEnroe, But Seriously, kemur út seinna í þessum mánuði. Fyrra bindinu, Serious, lauk árið 2002 þegar hann hafði skilið við leikkonuna Tatum O’Neal og stóð í forræðisdeilu við hana sem lauk með því að hann fékk forræði yfir þremur börnum þeirra. McEnroe hefur verið kvæntur söngkonunni Patty Smyth frá árinu 1997 og þau eiga tvær dætur. McEnroe, sem þótti á árum áður hinn mesti skaphundur, hefur mildast mjög með árunum. Hann rekur listagallerí í New York og segist nú vera á betri stað en nokkru sinni áður.