Bresku sjónvarpsverðlaunin, BAFTA, voru afhent síðastliðið sunnudagskvöld. Hamingjudalur var valinn besti dramaþátturinn og aðalleikkonan Sarah Lancashire var valin besta leikkonan. Þættirnir voru sýndir á RÚV á sínum tíma. Undir lok þakkarræðu sinnar beindi Lancashire orðum sínum til Claire Foy, sem tilnefnd var fyrir túlkun sína á Elísabetu II í The Crown, og sagði frammistöðu hennar í þáttunum hafa séð sér fyrir ánægjulegum sjónvarpskvöldum. Foy var greinilega snortin vegna þessara lofsyrða í sinn garð. Fyrirfram hafði verið reiknað með að The Crown yrði sigurvegari kvöldsins en svo varð ekki.

The People vs. O.J. Simpson var besta erlenda sjónvarpsserían og Coba Gooding Jr. var á staðnum og tók við þeim verðlaunum. Tom Hollander var valinn besti leikarinn í aukahlutverki fyrir leik sinn í Næturverðinum og var afar vel fagnað. Næturvörðurinn fékk einungis þessa einu tilnefningu til verðlaunanna og var það nokkuð gagnrýnt, en alls hafa þessir mögnuðu þættir hlotið fjörtíu og fimm tilnefningar til ýmiss konar verðlauna og þar af unnið fjórtán. Einnig hefur það verið gagnrýnt að Hvarfið II fékk ekki tilnefningar til BAFTA-verðlauna.

Kosið var um besta atriðið í sjónvarpi og fyrir valinu varð grimmileg árás snáka á eðlu út þáttunum Planet Earth, en þeir sem sáu þá þætti á RÚV geta vottað að það atriði var eins og úr bestu spennumynd.