Gunnar Ingi og Svava María eiga þrjú börn – Tvö þeirra takast á við mikil veikindi
Gunnar Ingi Gunnarsson og Svava María Ómarsdóttir eiga þrjú börn. Salómon Leví, Mikael Mána og Sigurrós Myrru. Salómon Leví, yngsti sonurinn, á við ýmsa fæðingargalla að etja. Mikael, sá elsti, greindist ungur með dæmigerða einhverfu og þegar hann var fjögurra ára greindist hann einnig með hvítblæði. Sigurrós Myrra, sem verður tveggja ára í sumar, er alveg heilbrigð. Gunnar og Svava lýsa henni sem miklum orkubolta.
„Eins og svo oft með einhverf börn kom þetta ekki strax í ljós. Margir höfðu orð á því hvað Mikael væri gott barn og hvað hann væri prúður þegar hann léki sér. Hann greindist þegar hann byrjaði í leikskólanum, um eins og hálfs árs, sem er mjög snemmt,“ segir Gunnar og bætir því við að þau séu afar þakklát fyrir að hafa fengið greiningu svona snemma. Það var mikill léttir.
Eftir að Mikael greindist síðan með hvítblæðið þurfti hann að venjast því að vera uppi á spítala hvern daginn á fætur öðrum og vera umkringdur heilbrigðisstarfsfólki. Verandi einhverfur var hann ekki ýkja sáttur við þessa skyndilegu breytingu.
Ef Mikael rumskaði um nóttina og byrjaði að líta í kringum sig flýttu hjúkrunar- fræðingarnir sér niður á gólf svo hann sæi þá ekki
„Þetta var ekkert smá erfitt. Fyrstu tvo mánuðina var hann öskrandi á hverjum einasta degi. Hann byrjaði að öskra um leið og hann varð var við einhvern koma inn á stofuna. Fyrstu vikurnar komu hjúkrunarfræðingarnir á fjórum fótum eftir gólfinu og reyndu að fela sig meðan þær stilltu tækin. Ef Mikael rumskaði um nóttina og byrjaði að líta í kringum sig flýttu þau sér niður á gólf svo hann sæi þau ekki,“ segir Gunnar og skellir upp úr. „Hjúkrunarfræðingarnir á Barnaspítalanum eru alveg magnað fólk.“
Mikael hefur þurft að fara í tíðar meðferðir. Fyrst var hann svæfður vikulega og krabbameinslyfi sprautað inn í mænuna. Þá var hann uppi á spítala fimm daga í senn og kom síðan heim. En nú hefur dregið úr því og hann á aðeins tvær slíkar meðferðir eftir. „Síðasta meðferðin hans er um miðjan ágúst. Eftir það fær hann töflur í eitt og hálft ár sem við getum gefið honum heima. Það verður mikill munur,“ segir Svava.
Batahorfur Mikaels eru sem betur fer mjög miklar. Sú tegund hvítblæðis sem hann greindist með er vel læknanleg og þar að auki er hann heppinn að hafa greinst svona ungur.
Gunnar og Svava hafa gengið í gegnum mikið upp á síðkastið og voru fyrir vikið betur undirbúin að takast á við erfiðleikana í sambandi við Salómon. „Þetta er nú þegar búið að vera mjög erfitt ár, þannig að það hefði þurft mikið til að koma okkur úr jafnvægi,“ segja þau.
Sjá frétt: Gunnar Ingi vill ekki vera þessi dæmigerði Íslendingur og segja: „Þetta reddast!“
Búið er að opna styrktarreikning fyrir ungu hjónin og börn þeirra, til að sjá til þess að þau þurfi ekki að hafa fjárhagsáhyggjur ofan á allt annað. „Það var systir mín sem fékk hugmyndina fyrst þegar Mikael greindist með hvítblæðið, síðan notuðum við sama reikning fyrir Salómon,“ segir Gunnar og bætir við að sér hafi fundist lygilegt að fylgjast með viðbrögðum fólks. „Við erum ótrúlega þakklát fyrir allan stuðninginn.“
Hægt er að styðja við bakið á Salómon Leví og Mikael Mána með því að greiða inn á styrktarsjóðinn.
Reikningsnúmer: 0115-15-630309
Kennitala: 230189-2939
