Cynthia Nixon leikur bandarísku 19. aldar skáldkonuna Emily Dickinson í kvikmyndinni A Quiet Passion. Nixon er þekktust fyrir leik sinn í sjónvarpsþáttunum Sex and the City þar sem hún fór með hlutverk Miröndu og vann til Emmy-verðlauna fyrir leik sinn. Dickinson var einfari, fór sjaldan að heiman og síðustu árin talaði hún við gesti bak við luktar dyr. Hún lést 55 ára gömul og það var ekki fyrr en eftir dauða sinn sem hún öðlaðist frægð. Nixon hefur fengið mikið lof fyrir túlkun sína á hinni sérsinna skáldkonu en hún er einlægur aðdáandi ljóða hennar.

Nixon er fimmtug og hefur leikið frá unga aldri. Hún lék í fyrstu mynd sinni einungis 12 ára gömul. Þegar hún var í háskóla komst hún í fréttir fyrir að leika á sama tíma í tveimur leikritum á Broadway og hljóp þá hvert kvöld á milli leikhúsanna.

Í fimmtán ár átti Nixon í sambandi við kennarann Danny Mozes og þau eiga tvö börn saman. Það vakti mikla athygli þegar leikkonan yfirgaf hann vegna konu, Christine Marinoni. Þær Nixon giftu sig árið 2012 og eiga sonin Max sem fæddist árið 2011. Um kynhneigð sína hefur Nixon sagt: „Mér finnst ég ekkert hafa breyst. Ég hafði alla ævi verið með karlmönnum og aldrei orðið ástfangin af konu. En þegar það gerðist þá var ekkert einkennilegt við það. Ég er bara kona sem er ástfangin af annarri konu.“