Michael Bublé og argentínska leikkonan Luisana Lopilato tilkynntu í nóvember síðastliðnum að eldri sonur þeirra, Noah þriggja ára, hefði greinst með krabbamein í lifur. Bublé sagði þá við aðdáendur sína: „Á þessum erfiða tíma biðjum við einungis um bænir ykkar og að þið virðið einkalíf okkar. Það er langt ferðalag framundan og ef Guð lofar, vonumst við til að vinna þessa baráttu með aðstoð fjölskyldu, vina og aðdáenda um allan heim.“

Noah hefur meðal annars verið í geislameðferð. Nýlega tilkynnti söngvarinn á Facebook-síðu sinni að meðferðin hefði tekist vel og læknar væru afar bjartsýnir á að Noah myndi ná fullum bata. „Hann hefur sýnt mikið hugrekki allan tímann og það hefur veitt okkur innblástur,“ sagði Bublé sem þakkaði læknum og hjúkrunarfólki innilega og bar mikið lof á störf þeirra. Söngvarinn þakkaði einnig Guði.

Bublé og Lopilato gengu í hjónaband árið 2011. Auk Noah eiga þau soninn Elias sem er eins árs. Veikindi eldri sonarins hafa tekið mjög á fjölskylduna en hjónin hafa bæði verið frá vinnu vegna þeirra. Þegar veikindin uppgötvuðust sagði Bublé að hann myndi ekki syngja á ný fyrr en Noah hefði náð fullum bata. Hann hefur gert eina undantekningu og það var þegar hann söng í fjársöfnun BBC fyrir börn í neyð. Þar söng hann Beach Boys-lagið God Only Knows.