Tónlistarmaðurinn Justin Bieber lenti í kröppum dansi í Ohio í Bandaríkjunum á dögunum þegar hann lenti í áflogum við aðdáanda sinn. Svo virðist vera sem Bieber hafi verið nokkuð heitt í hamsi eins og meðfylgjandi myndbönd sýna.

Myndböndin voru tekin á miðvikudagskvöld við hótel sem tónlistarmaðurinn dvaldi á. Á því fyrra má sjá Bieber og annan mann í orðaskaki. Bieber ýtir manninum sem bregst við með því að svara í sömu mynt. Bieber svarar aftur fyrir sig og virðist slá manninn hnefahöggi í andlitið. Maðurinn bregst við með því að taka hressilega á Bieber og snúa hann niður. Maðurinn sem um ræðir er talsvert stærri en Bieber.

TMZ greinir frá því að maðurinn sem lenti í átökum við Bieber heiti Lamont Richmond. Sá birti að minnsta kosti myndband af sér á Facebook þar sem hann segir frá atvikinu. Lamont segir að hann hafi spurt Bieber um eiginhandaáritun fyrir dætur sínar, en fljótlega hafi soðið upp úr. Hann hefur nú eytt færslunni af Facebook-síðu sinni eftir að TMZ fjallaði um hana.

Í frétt Mail Online um atvikið segir að fjöldi áhangenda hafi setið fyrir Bieber við hótelið sem hann dvaldi á og beðið um myndir og eiginhandaáritanir. Bieber var staddur í Ohio til að sjá leik Cleveland Cavaliers og Golden State Warriors í úrslitum NBA-deildarinnar í körfubolta. Daginn eftir áflogin virtist Bieber í góðu skapi. Hann birti mynd af sér á Instagram þar sem hann sagði: „Not a scratch on this pretty boy“.

Aðeins er mánuður síðan Bieber tilkynnti fylgjendum sínum á Instagram að hann kærði sig ekki um að láta taka myndir af sér með áhangendum. „Þetta er komið á það stig að fólk heilsar mér ekki lengur og tekur mér ekki sem manneskju. Mér líður eins og dýri í dýragarði. Ég vil halda geðheilsunni. Ég átta mig á því að fólk mun verða fyrir vonbrigðum,“ sagði hann.

Justin Bieber er væntanlegur til Íslands í september þar sem hann mun halda tvenna tónleika í Kórnum í Kópavogi.

Myndbönd af atvikinu á miðvikudagskvöld má sjá hér að neðan.