Hin 16 ára gamla Hanna Björt Stefánsdóttir er ung og upprennandi söngkona sem á dögunum ákvað að heiðra minningu bróður síns, Símonar Berg. Fékk hún til liðs við sig hóp hæfileikaríkra tónlistarmanna og var útkoman fallegt lag sem gefið er út á afmælisdegi Símonar.

„Símon var bara tveggja ára þegar hann dó en það var árið 1998,“ segir Hanna í samtali við blaðamann, en sjálf kom hún í heiminn tveimur árum síðar og náði því aldrei að kynnast bróður sínum heitnum. Minningu Símonar hefur ætíð verið haldið hátt á lofi og að sögn Hönnu hafa foreldrar hennar verið dugleg við að segja henni frá bróður hennar sem kvaddi þennan heim svo snögglega. „Þau hafa oft rifja upp skemmtilegar minningar sem þau eiga af honum, og svo eru myndir af honum hér og þar.“

Hún segir mikinn tónlistaráhuga í fjölskyldunni og þá sérstaklega hjá þeim feðginum en sjálf hefur Hanna stundað söngnám og stefnir á taka stigspróf. „Stuttu eftir að bróðir minn dó þá samdi pabbi lag sem fékk svo nafnið Einn þú sérð,“ segir hún. Lagið kom svo út á geisladisknum „Án þín“ nokkrum árum síðar en þá var það „instrumental“ og ekki með neinum texta.Um daginn fann ég síðan texta sem vinur pabba, Hjálmar R. Jónsson hafði samið við lagið,“ segir Hanna jafnframt og bætir við að þá hafði fæðst hugmyndin um að taka lagið upp með textanum og heiðra þannig minningu Símonar en hann hefði orðið tvítugur í dag, þann 6.maí.

Hanna fékk til liðs við sig góðan hóp tónlistarmanna og kveðst afar þakklát öllum þeim sem hjálpuðu til við að láta lagið verða að veruleika. Óskar Einarsson sá um píanóleik og útsetningu, Jóhann Ásmundsson spilaði á bassa og Davíð Sigurgeirsson á gítar. Lagið má nálgast hér fyrir neðan.

[youtube https://www.youtube.com/watch?v=zJJcNxOQKZ8&w=600&h=360]