„Mér þykir nú afskaplega leiðinlegt hvað ég hef verið misskilinn,“ sagði Óttar Guðmundsson geðlæknir, sem var gestur þeirra Mána og Frosta í þættinum Harmageddon á X-inu 977 í morgun. Vísaði Óttar til viðtals sem birtist á síðum Fréttablaðsins á dögunum.

„Hlutir eins og sorg, ástarsorg, tilvistarkreppa. Ég trúi því að við séum allt of oft að greina eitthvað sem eru kannski meira og minna eðlileg viðbrögð við ákveðnu óeðlilegu áreiti,“ sagði Óttar meðal annars í viðtalinu og bætti við: „Ég er til að mynda að tala um þessa ofnotkun á orðinu áfallastreita og áfallastreituröskun. Þetta að kalla til áfallateymi við öllu mögulegu.“

Óttar var gagnrýndur talsvert vegna þessara ummæla sinna.

Í Harmageddon í morgun sagðist hann ekki mæla gegn áfallahjálp, en hans skoðun sé að það eigi ekki að sjúkdómsvæða allt. Hann tók dæmi og spurði hvort fólk þurfi á áfallahjálp að halda ef það kviknar í öskutunnu við heimili viðkomandi. Að sögn Óttars eigi ekki að sjúkdómsvæða sorgina, en sorgin geti stundum orðið mjög óeðlileg sé hún of langdræg. Neitaði hann því að gera ætti lítið úr henni.

„Ég kom sjálfur fram í einu svona viðtali, kannski aumingi vikunnar viðtali, ég bara viðurkenni það hér og nú,“ sagði Óttar og vísar til viðtals þar sem hann kom fram og greindi frá sjálfsvígstilraunum sínum, en Óttar hefur gagnrýnt harðlega viðtöl sem birst hafa við fólk sem lent hefur í áföllum og þarfnast hjálpar.

„Er það til góðs að vera að opna sig í fjölmiðlum?“ sagði hann og vísaði sérstaklega til alkóhólista sem hann hafði kynnst þegar hann hafi unnið við áfengismeðferð. Hann segir slík viðtöl ekki hafa alltaf góð áhrif á fólk.

Óttar gaf út á dögunum bókina Frygð og fornar hetjur þar sem hann kafar djúpt í kynlíf í Íslendingasögunum. Hann segir Íslendinga geta lært margt af Íslendingasögum – til að mynda hvernig eigi að takast á við áföll.