Dagskrárgerðarmaðurinn Felix Bergsson sagði það magnað að lesa um samsæriskenningar tengdar Söngvakeppni Evrópskra sjónvarpsstöðva, Eurovision.

Felix birti færslu á Facebook þar sem hann lýsti því yfir að hann hefði gaman að því að lesa það sem skrifað er um Eurovision á samfélagsmiðlum, sem og öðrum miðlum. „Þar er nú aðallega talað um hversu illa rússneska lagið hafi farið í kosningu dómnefnda. Það getur alveg verið að andúð á Rússum hafi stjórnað einhverju þar en það verður þó aldrei fullreynt eða sannað.“

Mynd: DV ehf / Sigtryggur Ari

„Í því sambandi er vert að minna á að lagið fékk t.d. ekki góðan dóm hjá þeim Selmu Björns, Heru Björk og Friðriki Dór í Alla leið,“ segir Felix og segir þau ekki vera „innvígða og innmúraða Rússahatara.“

Hann segir dómarana sem velji lögin fyrir hvert land vera atvinnumenn sem hafi skoðun á tónlist. Þá nefnir hann sem dæmi að Pólland hafi ekki skorað hátt hjá dómnefndunum – 7 stig, og spyr hvort ætti þá að kalla dómarana Póllandshatara.

„Best finnst mér að margir þeirra sem gagnrýna keppnina hvað mest afhjúpa mikla vanþekkingu, t.d. um hvernig röð laga er ákveðin eða hvers vegna tónlistin verður að vera af bandi, og viðurkenna svo í næstu setningu að þeir nenni ekki að horfa, jú nema á Justin Timberlake,“ greinir hann frá og segir þá sem tali svona spá Eurovision dauða.

Felix segir Eurovision ekki vera fullkominn viðburð og hann verði það aldrei. Hann segir að menn verði að reyna að sneiða hjá pólitík en það takist ekki alltaf. Fókusinn vill hann að sé á tónlistinni og listamönnum, það takist þó ekki alltaf.