Ljóðskáldið Kristian Guttesen hefur hrundið af stað söfnun á Karolina Fund fyrir útgáfu tveggja bóka. Í fyrra kom safnið Eilífðir – Úrval ljóða 1995-2015, en útgáfa þeirrar bókar varð einmitt að veruleika í gegnum samfélagslega söfnun á fyrrnefndri síðu.

„Það hefur lengi verið draumur minn að gefa út tvær bækur á sama tíma og segja má að reynslan af söfnuninni í fyrra, sem í allan stað var jákvæð og hvetjandi, hafi blásið mér kjarki í brjósti.“ Bækurnar, sem nú er von á, nefnast Englablóð og Hendur morðingjans. Sú fyrri inniheldur ljóð og prósa, bæði stutta og langa, en seinni bókin, Hendur morðingjans, er stakur ljóðabálkur. Að sögn Kristians hafa sum ljóðanna úr hinum væntanlegu bókum áður birst í tímaritum.

Kristian hefur frá tvítugsaldri birt ljóð og sögur í tímaritum og dagblöðum á Norðurlöndum og hafa verk eftir hann verið þýdd á albönsku, dönsku, ensku, frönsku, malayalam, norsku og spænsku.

„Söfnunarsíðan Karolina Fund virkar þannig að maður gefur sér eitthvert tiltekið markmið og ákveðinn tíma til að ná því. Ef takmarkið næst ekki innan þess tíma, eru engin framlög innheimt. Hér er um útgáfu tveggja bóka að ræða og þarf ég því að setja markið hátt, þar sem prentun, ritstjórn, hönnun kápu og önnur aðkeypt vinna kostar sitt,“ segir Kristian sem er bjartsýnn á að ná settu marki.

„Grunnforsenda þess að ná árangri er að trúa á möguleikana, það eru möguleikarnir sem fleyta okkur áfram í tilverunni,“ bætir Kristian við en söfnunarsíðu hans má finna hér.