Eurovision-farinn Greta Salome Stefánsdóttir mun stíga á svið í Ericsson-höllinni í Stokkhólmi í Svíþjóð í kvöld fyrir hönd Íslands í Söngvakeppni Evrópskra sjónvarpsstöðva.

Í samtali við DV segir Hildur Tryggvadóttir Flóvenz, ritari FÁSES, félags áhugafólks um Söngvakeppni evrópskra sjónvarpsstöðva, mikla stemningu vera fyrir kvöldinu í Stokkhólmi, þar sem hún er stödd.

„Ég er viss um að þau fari áfram. Þetta lítur vel út, bæði í höllinni og í sjónvarpinu,“ segir Hildur. Aðspurð hvort hún sé sjálf á leið í höllina í kvöld, segir hún svo ekki vera. „Ég hef verið að fylgjast með æfingum og þetta lítur allt virkilega vel út,“ sagði Hildur og er vongóð um að Greta Salome komist úr undankeppninni og muni keppa á laugardaginn.

Hildur Tryggvadóttir Flóvenz. Hildur er í Svíþjóð og hefur góða tilfinningu fyrir kvöldinu. Hún er stjórnarmaður í FÁSES.

Aðspurð hvort FÁSES standi fyrir Eurovision-fögnuði hér heima segir hún ekki svo vera. „Íslendingar vilja alltaf vera með sín eigin partý og vilja vera með sínu fólki,“ segir Hildur, en segir að FÁSES standi fyrir uppákomu í Mosabacke í Stokkhólmi, þar sem verður að finna ekta íslenskt Eurovision-partý. Að sögn Hildar telur hún að yfir hundrað Íslendingar séu á leið í höllina í kvöld, því sé líklegt að áhorfendur muni sjá íslenska fánann í salnum.

Veðbankar virðast vera nokkuð jákvæðir í okkar garð, en samkvæmt vefsíðunni Eurovisionworld.com mun íslenska lagið komast upp úr undankeppninni í kvöld og keppa á laugardaginn. Veðbankar veðja einnig á að íslenska lagið muni lenda í sextánda sæti í aðalkeppninni á laugardag, ef lagið kemst áfram. Þegar Greta tók þátt í keppninni árið 2012 með lagið „Mundu eftir mér“ þar sem hún kom fram ásamt Jónsa, lenti hún í tuttugasta sæti.

Ef marka má tölur veðbankanna er Rússlandi spáð sigri, Úkraína er sögð lenda í öðru sæti og Frakkland í því þriðja. San Marínó mun lenda á botninum samkvæmt veðbönkum. Enn fremur má sjá að eina Norðurlandaþjóðin sem nær inn á topp tíu listann er Svíþjóð, en Svíum er spáð einu af efstu fimm sætunum. Sjáðu listann hér

Fyrir þá sem enn eiga eftir að kynna sér lögin í keppninni í ár, geta gert það hér að neðan: