Leikarahjónin Dax Shepard og Kristen Bell eru grjótharðir aðdáendur þáttanna Game of Thrones, eins og sjá má á meðfylgjandi mynd. Hjónin fengu miða á frumsýningu þáttanna í Los Angeles í vikunni og mættu í sérútbúnum hlýrabolum auk þess að láta teikna á sig húðflúr á bringuna sem átti að sýna aðdáun þeirra, en á þeim stóð meðal annars: „Winter is coming“ eða veturinn nálgast, setningu sem aðdáendur þáttanna ættu að kannast vel við.

Svo virðist sem þau hafi lifað sig betur inn í frumsýninguna en flestir viðstaddir, en Kristen segir frá þessu ævintýri þeirra á Instragram-myndasíðunni sinni.

„Á einum tímapunkti lyfti ég melónu upp yfir höfuðið á mér og sagði: „Þetta egg mun breyta sögunni“ og hljóp út um eldvarnahurð,“ segir hún og bætir við að aðrir gestir hafi látið sér nægja að drekka kokteila og spjalla saman í jakkafötum og fínum kjólum.

Sjálf er Kristen önnum kafin við að kynna kvikmyndina The Boss, sem sýnd er í kvikmyndahúsum um allan heim um þessar mundir. Í myndinni leikur hún annað aðalhlutverkið á móti gamanleikkonunni Melissu McCarthy.