Hætti að reyna og hefur aldrei verið glaðari – Hvetur fólk til feta hinn gullna meðalveg í mataræði og njóta lífsins
„Nú er ég steinhætt því að reyna og hef aldrei verið glaðari. Ég borða það sem mig langar í hverju sinni, líka í veislum og annarsstaðar en reyni að borða þannig að ég verði ekki mjög södd,“ segir Ebba Guðný Guðmundsdóttir sjónvarpskokkurinn ástsæli, en hún ritaði nýlega áhugaverðan pistil þar sem hún viðurkennir að hafa reynt að grenna sig á yngri árum og því hafi fylgt öfgar í mataræði. Hún hafi þó lært af reynslunni. Bendir hún fólki á að langskemmtilegast, einfaldast og best sé að feta hinn gullna meðalveg í mataræði eins og öllu öðru.
Ebba er fyrir löngu landskunn fyrir sjónvarpsþætti sína og bækur þar sem hún kennir Íslendingum að matreiða girnilega og holla rétti. Ebba birtir umræddan pistilinn á Facebook-síðu sinni þar sem hún segir að fyrir nokkrum árum hafi hún fyrst heyrt af röskuninni „orthorexia nervosa“ en um er að ræða ástand þar sem einstaklingur fær þráhyggju fyrir því að að borða ávallt holla og hreina fæðu.
„Mín viska til ykkar er að borða flest allt (fjölbreytt) en borða í hófi (ekki yfir sig). Ofát er mjög óhollt og það er mikið álag á líkamann að borða þannig að maður verði sprengsaddur. Sumir borða alltaf hóflega, á meðan aðrir þurfa að læra það hægt og bítandi. Það er auðveldara að borða hóflega þegar maður borðar mestmegnis hollan og næringarríkan mat af því líkaminn er fyrr mettur og fullnægður þegar borðað er hollt og sækir þá minna í óhollustu. Og þegar maður er ekki stanslaust að neita sér um allt mögulegt, er miklu auðveldara að borða hóflega. Strangar (óraunhæfar) reglur varðandi mataræði leiða miklu frekar til ofáts, af því á endanum springa flestir,“ ritar Ebba.
„Lífið er ekki svart og hvítt og það er svo gaman að gera sér dagamun. Það eru afmæli og veislur og það eru matarboð og kósíkvöld .. og það er þetta og það er hitt. Það er allt í best lagi og það gerist ekki neitt hræðilegt þó maður fái sér stundum sykur, hveiti, eða hvað það nú er. Í stuttu máli, óhollusta í hófi gerir okkur ekki slæmt. Hún getur oft gert manni mjög gott,“ segir hún og nefnir því næst lítið dæmi:
„Það er mikill munur á því að borða 40 frönskur eða fá sér 10 stk. með hamborgaranum, 4 sopa af kóki í staðinn fyrir 1/2 L – 2 kökusneiðar í staðinn fyrir 6 kökusneiðar – 1 súkkulaðistykki, tala nú ekki um ef maður er með dökkt, í staðinn fyrir fullan poka af sælgæti og gos með.“
Ebba viðurkennir fúslega að hafa sjálf fallið í þá gildru að reyna að standast ómögulegar útlitskröfur en vitanlega hafi það ekki gengið upp. „Ég reyndi vel og lengi á mínum yngri árum að grenna mig. Mig langaði svo að verða há og grönn. Ég er lágvaxin (1.62cm) og ég er ekki grannvaxin og verð það aldrei. Ég er loksins búin að ná því. Nú er ég steinhætt því að reyna og hef aldrei verið glaðari. Ég borða það sem mig langar í hverju sinni, líka í veislum og annarsstaðar en reyni að borða þannig að ég verði ekki mjög södd. Ég borða mestmegnis hollt og hreint (versla þannig inn) en hef engar áhyggjur af því þegar ég geri það ekki. Ég er ánægð með mig eins og ég er (oftast) og reyni að hugsa vel um Ebbu af því hún er góð stúlka,“ ritar Ebba síðan.
„Ég bið að þið séuð öll ánægð með ykkur og sjáið allt það frábæra í ykkar fari. Ég vona að þið séuð góð við ykkur og njótið þess að vera til og eyðið mestri af orku ykkar í það sem skiptir mestu máli í lífinu, eins og börnin ykkar, hjónabandið, vinir, samvera, hlátur og hlýja en ekki kaloríur eða kíló til eða frá. Þið munuð aldrei sjá eftir því. Ef við förum í bað, tannburstum okkur, erum góðar manneskjur og reynum að láta gott af okkur leiða, erum við öll í mjög góðum málum.“
