„Ég held að þetta skinkunafn sem var lengi notað á mig hafi átt rætur að tekja í KR og þetta loddi við mig, þetta til dæmis, í rauninni allan minn feril,“ segir Hörður Magnússon, íþróttafréttamaður hjá 365 og einn markahæsti leikmaður Íslandsmótsins í fótbolta frá upphafi.

Hörður var í viðtali í þættinum Maður á mann á Rás 1 í gær. Þar ræddi Hörður við þáttastjórnandann Kjartan Guðmundsson um feril sinn og opnaði Hörður sig meðal annars um þann fúkyrðaflaum sem hann fékk yfir sig þegar hann var leikmaður.

„Þetta var sérstaklega slæmt á nokkrum völlum og til þess gert að koma mér úr jafnvægi. Ég tók þessu svona erfiðlega fyrst og svo vandist þetta og ég náði að brynja mig svolítið frá þessu. Ég held að þetta hafi gert mig að ákveðnari og jafnvel betri leikmanni,“ sagði Hörður sem lék lengst af með FH. Í viðtalinu sagði Hörður að fáir leikmenn hafi fengið jafn miklar gusur frá áhorfendum og hann fékk.

Hörður sagðist aldrei hafa tjáð sig opinberlega um þetta áður, en aðspurður hvers vegna hann varð skotspónn áhorfenda sagðist Hörður ekki geta útskýrt það með fullnægjandi hætti. Hörður benti þó á að hann hafi alltaf látið til sín taka inni á vellinum og spilaði með FH-liði sem stóð bestu liðum landsins talsvert að baki. Þá hafi líkamsbygging hans eflaust spilað inn í.

„Þetta eiginlega byrjaði úti í Vesturbæ og var mjög slæmt til dæmis bæði í Keflavík og í Vestmannaeyjum. Það í raun og veru gerði mig ennþá ákveðnari í að standa mig og mér gekk yfirleitt mjög vel á móti þessum liðum. Maður algjörlega skilur það að það sé baulað á menn en það sem ég lenti í var á köflum alveg mjög slæmt,“ sagði Hörður og bætti við að þetta hafi farið fyrir brjóstið á fjölskyldunni hans.

Rifjaði hann upp atvikið sem varð þegar hann var að stíga sín fyrstu skref í fótboltanum. Þá birtist lítil frétt í Morgunblaðinu þar sem fyrirsögnin var á þá leið að sonur Bjössa bollu hefði skorað. Hörður er sem kunnugt er sonur leikarans Magnúsar Ólafssonar.

„Ég held að pabbi hafi hringt í viðkomandi blaðamann og beðið hann að hætta þessu.“

Hörður ræddi einnig um „skinku“-viðurnefnið og sagði hann að það færi enn þann dag í dag mjög í taugarnar á honum. „Ég held að þetta skinkunafn sem var lengi notað á mig hafi átt rætur að rekja í KR og þetta loðaði við mig, þetta til dæmis, í rauninni allan minn feril. Það fer ennþá rosalega í taugarnar á mér. Ég er bara þannig, ég er tilfinningavera og mér finnst þetta eitthvað sem að, ja, það hefði mátt reyna að gera eitthvað meira í þessu eins og KSÍ er að gera núna undanfarin ár, það hefði mátt opna á þessa umræðu fyrr,“ sagði Hörður.

Hér má hlusta á viðtalið í heild sinni.