Rekstrarfélagið Móberg hefur ákveðið að selja lífstílsvefsíðuna Hún.is til Fréttatímans. Móberg er stærsti eigandi Bland.is og rekur margar aðrar vinsælar vefsíður.

Í samtali við DV segir Kidda Svarfdal, ritstjóri Hún.is, að vefurinn hafi verið seldur til Fréttatímans og að ritstjórn vefsins sé flutt í húsakynni Fréttatímans. Undanfarin tvö ár hefur Hún.is verið í eigu Móbergs, sem á og rekur margar vinsælar vefsíður. Þar á undan var vefsvæðið í eigu Kiddu Svarfdal, Bryndísar Gyðu Michelsen og Kristrúnar Aspar Barkardóttur.

Að sögn Kiddu mun hún halda áfram sem ritstjóri mun Guðrún Veiga Guðmundsdóttir verða aðstoðarritstjóri. Aðspurð hvort einhverra breytinga sé að vænta vill hún ekki gefa neitt upp, en segir að til að byrja með verði Hún.is aðeins á netinu og aldrei sé að vita hvort út muni koma blað.