Fyrirsætan og ­athafnakonan Ásdís Rán ­Gunnarsdóttir er komin með þyrluflugmannspróf, en hún greindi frá tíðindunum á Facbook-síðu sinni fyrir páska. Hún hóf námið í ágúst síðastliðnum í Búkarest í Rúmeníu eftir að hafa látið sig dreyma um flugmannsréttindi í tíu ár.

Á bloggsíðu sinni segist hún hafa ferðast á milli Búlgaríu, þar sem hún er ­búsett, Rúmeníu og Íslands síðustu mánuði til að sinna náminu. Hún lærði á þyrlu af gerðinni Robinson 22. „Ég verð að segja að þetta er erfiðasta markmið sem ég hef sett mér í lífinu. Þetta hefur kostað blóð, svita og tár síðustu mánuði og nú er ég svo nálægt því að ná markmiðinu,“ skrifaði Ásdís á bloggsíðu sína ­fyrir nokkrum vikum. „Ég vonast til að geta hvatt aðrar konur til að eltast við drauma sína og sýnt þeim fram á að ekkert er ómögulegt,“ skrifaði hún jafnframt.

Ásdís, sem hefur verið dugleg að birta myndir af sér í þyrlunni, greinir svo frá því á Facebook-síðu sinni að hún stefni nú á að hefja þjálfun á þyrlu af gerðinni As350 turbine í Svíþjóð í apríl. Þá þakkar hún fyrrverandi eiginmanni sínum Garðari Gunnlaugssyni, fjölskyldu hans og vinkonu sinni fyrir að hafa gert sér kleift að láta þennan draum sinn rætast.

Það er fyrir löngu orðið ljóst að Ásdísi er margt til lista lagt og hún kallar ekki allt ömmu sína. Síðustu mánuði hefur hún líka verið að læra að læra að skjóta af ­byssu og ætti hún að vera orðin nokkuð vel sett með þessa fjölbreyttu kunnáttu sína og þekkingu. n