„Ég taldi mér trú um að ég væri ekki í neyslu, ég væri bara að fikta. Þetta var auðvitað bara afneitun,“ segir Þórhallur Þórhallsson uppistandari sem hefur frá barnsaldri þjáðst af kvíðaröskun en hann hikar ekki við að gera grín að fylgifiskum kvíðans þegar hann fer með gamanmál. Hann segir fólk þakklátt fyrir hreinskilnina enda geti það sjálft samsvarað sig við það sem hann er að ganga í gegnum.

Þórhallur, sem er sonur hins landsþekkta skemmtikrafts Ladda, er í viðtali við Páskablað DV þar sem hann segir meðal annars frá því hvernig vanlíðan tengd kvíðaröskuninni leiddi hann út í fíkniefnaneyslu. Dópið átti að vera deyfilyf fyrir kvíðann en hafði í raun þveröfug áhrif.

„Á þessum tíma var rútínan þannig að um helgar tók maður inn efni og allt var æðislegt og frábært og ég var kóngurinn – enda ekki að ástæðulausu að það er talað um alsælu. Síðan vaknaði ég á mánudegi og þá var lífið búið. Mér leið eins og ég hefði myrt þrjár manneskjur og vanlíðanin var ólýsanleg.“

Í viðtalinu lýsir hann því hvernig hnífstunga í partýi varð til þess að hann sneri við blaðinu og sá á hvaða braut hann var kominn. Hann þurfti hins vegar að horfa upp á neyslufélaga sína enda á götunni eða innan fangelsismúranna auk þess sem nokkrir féllu fyrir eigin hendi. „Mér tókst að hætta sjálfur og ég tek því ekki sem gefnu. Ef ég hefði haldið neyslunni áfram vil ég ekki vita hvar ég hefði endað.“

Viðtalið við Þórhall má lesa í heild sinni hér