Söngleikurinn Mamma mia var frumsýndur í Borgarleikhúsinu á föstudagskvöld fyrir fullu húsi, að sjálfsögðu, enda fjölmargir búnir að bíða sýningarinnar með mikilli eftirvæntingu. Mamma mia hefur farið sigurför um heiminn og því var ekki við öðru að búast en að undirtektirnar hér á landi yrðu góðar. Óhætt er að segja að eftirspurnin eftir miðum hafi farið fram úr björtustu vonum því nú þegar er búið að selja um 36 þúsund miða á söngleikinn. Ef allir hafa greitt 7.500 krónur fyrir miðann sinn, sem hann kostar í miðasölu án afsláttar, er Borgarleikhúsið búið að selja miða á sýninguna fyrir 270 milljónir króna. Það hlýtur að teljast nokkuð gott miðað við að aðeins ein sýningarhelgi er liðin. Leikhúsgestir hafa keppst við að lofsama sýninguna á samfélagsmiðlum og má því ætla að Mamma mia standist allar væntingar. Gott orðspor sýningarinnar mun eflaust auka eftirspurnina enn frekar og ljóst er að þeir sem að sýningunni standa munu ekki unna sér hvíldar fyrr en einhvern tímann í sumar, þegar leikhúsið fer í frí. Það er Unnur Ösp Stefánsdóttir sem leikstýrir sýningunni, en með aðalhlutverk fara Jóhanna Vigdís Arnardóttir, Helgi Björnsson og Þórunn Arna Kristjánsdóttir.

Glæsileg á hækjum Leikkonan Vigdís Hrefna Pálsdóttir fótbrotnaði þegar hún féll á æfingu á verkinu Hleyptu þeim rétta inn í Þjóðleikhúsinu. Önnur leikkona þurfti að taka við keflinu, enda stóð til að frumsýna verkið nokkrum dögum síðar. Vigdís gerir hins vegar gott úr þessu og kíkir sjálf í leikhús. Hér er hún í góðum félagsskap Magnúsar Geirs Þórðarsonar útvarpsstjóra.

Flott fjölskylda Þorgerður Katrín Gunnarsdóttir og Kristján Arason mættu með dóttur sína í leikhúsið og leikhússtjórinn Kristín Eysteinsdóttir heilsaði upp á þau.

Flott hjón Tónlistarmaðurinn KK lét sig ekki vanta og mætti með eiginkonuna, Þórunni Rannveigu Þórarinsdóttur, upp á arminn.

Flottar mæðgur Steinunn Ólína Þorsteinsdóttir átti góða endurkomu í leiklistina og sló í gegn bæði í Ófærð og Rétti. Hún bauð dóttur sinni með í leikhús.

Mæðgur Björk Eiðsdóttir, ritstjóri Man magasín, og dóttir hennar Blær brostu breitt til ljósmyndara.

Xxxxxxxxxxxxxx Andri Snær Magnason og kona hans, Margrét Sjöfn Torp, voru spennt fyrir söngleiknum.

Sætar mæðgur Rakel Þorbergsdóttir, fréttastjóri RÚV, mætti með dóttur sína í leikhúsið. Þær mæðgur voru að sjálfsögðu léttar í lund fyrir sýningu.

Tilhlökkun Júlíus Vífill Ingvarsson, borgarfulltrúi Sjálfstæðisflokksins, og kona hans, Svanhildur Blöndal, lyftu sér upp í leikhúsinu.