Samfélagsmiðlar hafa breytt okkur. En ekki er allt jákvætt. Þetta segir Birgir Örn Guðjónsson, betur þekktur sem Biggi lögga. Hann tjáir sig um samfélagsmiðlana í pistli og hefur eitt og annað við þá að athuga.

„Eins og með allt nýtt tókum við Íslendingar og snýttum þessari nýjung. Settum enn eitt höfðatöluheimsmetið. Nú held ég að við séum á góðri leið með að hlaða í annað svona met. Við erum að verða „fúlasta land í heimi“. Vúhú. Við gjörsamlega elskum raunarsögur af veikindum, vandræðum, gjaldþrotum, útburðum, burtreknum og allskonar fórnarlömbum. Sorgmædd andlit á forsíðum fréttasíðna kveikja í okkur einhverja samkennd og fullnægja reiðiþörfinni okkar sem við elskum eitthvað svo að hata.“

Biggi segist sjálfur hafa spígsporað um umræðusvæði netmiðla líkt og ráðvilltur unglingur á útihátíð. Við það hafi hann komist að því að reiðilestrar og harmsögur séu líklegastar til að fá sem flest læk.

„Ríkisstjórnin, verðtryggingin, sjúkrahúsin, launin, kvíðinn, þunglyndið, óréttlætið og ömurlegheitin. You name it. Umræðan elskar að fara í fýlu. Þetta er samt í raun ekki slæmt. Það er nefnilega frábært að við skulum nota tjáningarfrelsið til að láta vita af óánægju okkar. Við þurfum bara að passa okkur á því að gera fýluna ekki að lífstíl.“

Biggi bætir við að gott sé að hafa skoðanir en hættulegt að „leita alltaf í leðjuna.“

„Það er í lagi að finnast íþróttabolur ljótur eða sjónvarpsþáttur leiðinlegur án þess að öskra það endalaust á mjólkurkassa á gatnamótum Fésbókarstrætis og Twittersunds.“

Biggi bætir við:

„Við þurfum ekki stanslaust að næra nöldrarann í okkur á skít og skömm. Stundum er allt í lagi að stíga tvö skref aftur og einbeita sér aðeins meira af því sem er jákvætt og skemmtilegt. Það er nefnilega allskonar þannig inn á milli. Eiginlega bara alveg fullt.“

Þá segir Biggi að lokum að fólk eigi að nýta málfrelsið en þó án þess að missa af lífinu.

„Með því að vökva þetta fúlasta land í heimi erum við líka að gróðursetja þannig fræ í næstu kynslóð. Það er pínu scary.“