„Að þetta hafi verið 2 atvik er ekki satt, heldur síendurtekin atvik og ljót hegðun sem stóð yfir í margar vikur,“ segir Þórunn Antonía Magnúsdóttir, tónlistarkona og fyrrverandi dómari í Ísland Got Talent. Um helgina var greint frá því að Bubbi hefði lagt Þórunni í einelti á meðan tökur á fyrstu þáttaröð Ísland Got Talent fóru fram.

Í viðtali í Fréttablaðinu um helgina sagði Þórunn að samstarfsmaðurinn, sem Bubbi viðurkenndi síðar að væri hann, hefði meðal annars kallað hana óhæfa móður. Bubbi viðurkenndi að hafa strítt Þórunni og baðst hann afsökunar á því. Hann neitaði þó að hafa lagt hana í einelti.

Sjá einnig: Þórunn Antonía stígur fram: Lögð í einelti í Ísland Got Talent

Þórunn sagðist í kjölfarið vera búin að fyrirgefa Bubba þó hún biði enn eftir „alvöru afsökunarbeiðni“.

Hvorki Þórunn né Bubbi virðast samt hafa sagt sitt síðasta og í gærkvöldi gagnrýndi Bubbi Þórunni á Twitter. Sagðist Bubbi telja að Þórunn þrái viðurkenningu og hún spili sig sem fórnarlamb. Þá sagði hann að búið væri að gjaldfella orðið einelti.

Það er búið að gjaldfella orðið einelt,.Þú getur notað það sem vopn
þú getur notað það sem snuð því miður.

— Bubbi Morthens (@BubbiMorthens) February 7, 2016

//platform.twitter.com/widgets.js

hún á að viðurkenna hún vill völd ekkert að því um það snýst þetta hún mun spjara sig

— Bubbi Morthens (@BubbiMorthens) February 7, 2016

//platform.twitter.com/widgets.js

Þórunn svarar Bubba í athugasemdakerfi Vísis þar sem hún segir Bubba hafa hagað sér illa. Hún segist ekki vera að spila sig sem fórnarlamb og það sé merki um styrk að sýna auðmýkt og tala frá hjartanu. Hún segir að viðtalið í Fréttablaðinu hafi snúist um annað og meira en Bubba Morthens.

„Þetta viðtal snérist um margt miklu stærra en þennan mann. Það snérist um að afmá glansmyndir, að skila skömminni, að vera heiðarleg við heiminn og sjálfa mig, að stíga fram, að þora, að láta ekki vaða yfir sig.
Ég var spurð um upplifun mína á þessu verkefni og svaraði í hreinskilni. Ég nafngreindi engan, hann ákvað að gera það sjálfur og halda hegðun sinni áfram,“ segir Þórunn og bætir við:

„Eitt fallegt orð sem allir sem fara yfir strikið gætu lært að segja og skrifa er fyrirgefðu. Bara Fyrirgefðu. Án réttlætinga, án háðs í garð þess sem finnst á sér brotið og án lyga og hroka. Ekki sem twitter færsla, ekki sem facebook status á síðu sem ég hef ekki aðgang að. Það er ekki afsökunarbeiðni að segja ég var bara að djóka. Afsökunarbeiðni er eitt einlægt orð. Fyrirgefðu. Ég trúi varla að ég sé hér að þurfa að svara þessu á kommenta kerfi en
Stál og hnífur er merki þitt. Ást og blíða mitt.“