„Mig langaði að breyta þessu. Það er eðlilegur hlutur í lífinu að eignast börn,“ segir Halla Koppel leik- og söngkona, einnig þekkt sem Halla Vilhjálmsdóttir en hún eignaðist dóttur sína tveimur dögum eftir að hún hóf skólagöngu við Oxford háskóla. Hún segir mikilvægt að fólk sýni nýbökuðum mæðrum svigrúm á meðan þær fóta sig í námi og á vinnumarkaði með lítil börn.

Halla er í viðtali við breska miðilinn Financial Times en hún stundar eins árs MBA nám við Oxford háskóla. Segir hún að stærsta áskorunin sem fylgi því að vera í krefjandi háskólanámi og með barn á brjósti sé sú að skipuleggja tímann og koma til móts við skólafélaga sína hvað það varðar. Öfugt við þá hafi hún ekki auka korter til að bíða. Hún hafi komið niður á hentuga lausn. „Þegar ég hef búist við því að fundir eiga eftir að teygjast á langinn þá annað hvort tek ég dóttur mína með mér eða held fundinn heima hjá mér,“ segir Halla en heimili hennar er í nokkura mínútna göngufjarlægð frá skólanum.

Hún segir mikilvægt að viðskiptaheimurinn taki mæðrum opnum örmum. „Það er mikilvægt fyrir fólk í MBA náminu að læra að vinna með mæðrum. Þetta þarf að vera sýnilegt. Á mörgum vinnustöðum fara konur leynt með það að þær eigi börn.“

Þá segist hún trúa því að í framtíðinni gæti fólk átt von á því að sjá sífellt fleiri mæður með ungabörn sín á vinnustaðnum og gæti það orðið jafnsjálfsagður hlutur og bann við reykingum á hinum ýmsu stöðum. „Það tók engan tíma fyrir bannið að vera viðurkennt.“

„Þetta er erfið vinna, þetta er mjög,mjög erfið vinna en þú átt ekki að láta það hindra þig í því að öðlast MBA gráðu,“ segir Halla einnig, aðspurð um hvernig það sé að tvinna saman móðurhlutverkið og námið.

Viðtalið við Höllu má lesa í heild sinni hér