Allir lögðust á eitt til að gera „Kópasker the musical“
„Ég hætti eiginlega fyrir fjórum árum að reyna að halda utan um hversu margir voru búnir að horfa á þetta. Þetta virðist ennþá lifa í dag,“ segir Ottó Gunnarsson kvikmyndagerðarmaður en hann er einn af meðlimum þríeykisins Efri Hólabræður eða Every Whole Brothers ásamt bræðrum sínum þeim Óla Jóni og Ómari. Bræðurnir öðluðust óvænta frægð árið 2010 eftir að myndskeið af svokölluðu Sleifaratriði sló rækilega í gegn á vefnum og fékk milljónir áhorfa á Youtube. Þeir hafa nú sent frá sér nýtt myndband sem má segja að sé nokkurs konar óður til heimabæjar þeirra Kópaskers.
Umrætt Sleifaratriði rataði á sínum tíma í spjallþátt Jay Leno auk þess sem japanskt framleiðslufyrirtæki keypti einkarétt á notkun myndbandsins í Japan í heilt ár. „Við höfum semsagt undanfarin tíu ár gert myndbönd með leiknum sketsum fyrir þorrablótin á Kópaskeri,“ segir Ottó og bætir við Sleifaratriðið fræga hafi verið gert í þeim tilgangi. „Núna í ár langaði okkur hins vegar að breyta til og ákváðum að myndband sem inniheldi nokkur þekkt lög með nýjum textum tengdum Kópaskeri sem væru síðan sungin af vel völdu fólki.“
Útkoman var nokkurs konar söngleikur um Kópasker: „Kópasker the musical“ og er óhætt að segja að hér sé á ferð eitt metnaðarfyllsta þorrablótsmyndband síðari ára. „Þeir sem tóku þátt eru meira og minna allt brottfluttir úr bænum, við bræðurnir, unnusta mín Anna Karen, Stefán Jónsson áhugaleikari á Akureyri og svo Lilja Guðmundsdóttir söngkona. Sigurður Magnússon kvikmyndagerðarmaður var síðan okkur innan handar.“
„Jú, jú við fáum það nú svona annars lagið í hausinn,“ segir Ottó aðspurður um hvort fólk sé ennþá að minnast á Sleifaratriðið við þá bræður. „Ég er oft að vinna með útlendingum sem muna eftir að hafa séð það og minnast á það við mann.“
Söngleikinn um Kópasker má sjá hér fyrir neðan.
[youtube https://www.youtube.com/watch?v=a5QbOs4cmJo&w=600&h=360][youtube https://www.youtube.com/watch?v=RgsTojbvdZc&w=600&h=480]
Hér má jafnframt sjá hið fræga Sleifaratriði frá árinu 2010:
[youtube https://www.youtube.com/watch?v=TXPQY_VRP6M?feature=player_embedded&w=600&h=360]
