Frosta Logasyni, öðrum þáttastjórnenda Harmageddon á X-inu, var lofað tugmilljóna greiðslum frá lögfræðingi fyrir skemmstu. Athyglisvert símtal á milli Frosta og mannsins, Vincent Johnson, má heyra hér neðst í fréttinni.

„Ég hef beðið eftir upplýsingum frá þér lengi,“ sagði maðurinn sem kvaðst vera lögfræðingur að nafni Vincent Johnson, en upptakan var spiluð í Harmageddon í morgun. Tekið skal fram strax að þarna var líklega um svikahrapp að ræða í leit að skjótfengnum gróða í gegnum svokallað Nígeríusvindl.

Kostulegt samtalið milli Frosta og Vincent má heyra hér neðst en á Vincent heyrist að hann er ekkert allt of sáttur við seinagang Frosta í að senda nauðsynlegar upplýsingar. Vincent hafði lofað að millifæra á hann háar fjárhæðir vegna fjarskylds ættingja Frosta í Tógó sem fallið hafði frá. „Ég er búinn að senda þér upplýsingar á netfangið þitt,“ sagði Frosti, Vincent til ánægju.

Hann ítrekaði fyrir Frosta að hann mætti ekki segja neinum frá arfinum og greiðslunum sem senn myndu berast. Frosti sagði Vincent að hann væri honum þakklátur fyrir hugulsemina og aðstoðina við að leysa arfinn út. „Þú ert frábær lögfræðingur – Guð blessi þig.“

Eftir að samtali þeirra Frosta og Vincent lauk kom fram í þættinum að svindl líkt og þetta séu þekkt leið svikahrappa. Mennirnir senda ógrynni af tölvupóstum sem hugsanlega örfáir einstaklingar hafa fyrir að svara. „Maður þarf að passa sig. Ég gaf honum bara nafnið mitt og símanúmerið mitt hérna í vinnunni. Maður verður að passa sig í hverju skrefi,“ sagði Frosti en hlustendur Harmageddon geta fylgst með hvernig málin þróast á næstu dögum og vikum.

Hér má hlusta á upptöku úr Harmageddon frá því í gær en þar er Vincent kynntur til sögunnar: