Erfitt lag Jakob Frímann sagði að Anna Fanney væri hugrökk áður en hún hóf sönginn.

Anna Fanney, tólf ára, gerði allt vitlaust í Ísland Got Talent á Stöð 2 í gærkvöldi þegar hún söng lagið If I Ain‘t Got You með Aliciu Keys. Óhætt er að segja að þessi stórefnilega söngkona hafi komið á óvart með frammistöðu sinni.

„Þú ert hugrökk. Þetta er ekkert auðvelt lag að syngja,“ sagði Jakob Frímann Magnússon, einn dómara þáttarins, þegar Anna Fanney tilkynnti hvaða lag hún ætlaði að syngja.

Salurinn ærðist úr fögnuði þegar Anna hóf sönginn og sagði Ágústa Eva Erlendsdóttir, dómari, einfaldlega: „Þegiðu!“

Undrandi Ágústa Eva var hrifin af flutningi Önnu, eiginlega orðlaus.

Jakob Frímann ýtti svo á gullhnappinn en á hann mega dómarar ýta ef þeir sjá eitthvað virkilega sérstakt atriði. Og óhætt er að segja að Anna Fanney hafi staðið undir því og gott betur en það.

„Ég hef aldrei heyrt tólf ára stúlku syngja svona áður og þegar maður heyrir svona rödd þá finnur maður sig knúinn til að ýta á gullhnappinn,“ sagði Jakob Frímann og bætti Dr. Gunni við að hún væri „fáránlega góð.“

„Ég þurfti að halda mér í – ég hef aldrei lent í svona. Þú ert ótrúleg,“ sagði Ágústa Eva á meðan Marta María Jónasdóttir sagðist hafa fengið „svo mikla gæsahúð að annað eins hafi bara ekki sést“. Anna Fanney sagði við MC Gauta, sem kynnir þættina, að hún væri í sjokki.

Magnaðan flutning Önnu Fanneyjar má sjá í spilaranum hér að neðan.