Aðalsteinn Pétur Karlsson vermir efsta sætið á lokaborði UKIPT-pókermótsins í Dublin á Írlandi með 4.420.000 spilapeninga í borði.

Aðalsteinn er einn af sextán á borði og er honum fylgt fast á eftir af David Pollock frá Írlandi, Vladas Tamasauskas frá Litháen og Quentin Dellis frá Belgíu.

Eftir því sem DV kemst næst er Aðalsteinn nú þegar búinn að vinna sér inn að lágmarki 2,2 milljónir króna en ef hann vinnur lokaborðið á morgun fer hann heim með 176 þúsund evrur eða rúmar 25 milljónir íslenskra króna. Einn laufakóngur skilaði því að Aðalsteinn vann efsta sætið af Adam Owen frá Englandi.

Aðalsteinn, sem kemur frá Húsavík, vann Íslandsmeistaratitilinn í póker á Hótel Borgarnesi í nóvember síðastliðnum. Fékk hann 1,5 milljón í verðlaunafé.

Aðalsteinn hóf að spila póker árið 2010. Hann sagði í samtali við DV þegar hann vann Íslandsmeistaratitilinn að margt hafi breyst á þeim tíma sem hann hefur spilað íþróttina. Klúbbar halda nú í mun meira mæli skipulögð mót og unnið hefur við hörðum höndum að því að breyta ímynd pókesr, sem Aðalsteinn segir að of margir sjái aðeins sem hættulegt fjárhættuspil. „Mótapóker er hugaríþrótt, rétt eins og skák eða Brids og það tekur á að spila rétt eins og í öðrum hugaríþróttum,“ sagði Aðalsteinn.