Sögulegar sættir gætu verið í vændum hjá bandarísku söngkonunum Taylor Swift og Katy Perry en þær hafa átt í illvígum deilum síðastliðin ár. Hefur Katy nú boðið Taylor ásamt bresku söngkonunni Adele í fyrirpartý fyrir Grammy-verðlaunin í kvöld. Ekki er vitað hvort þær verði við boðinu en Grammy-verðlaunin eru í boði Spotify, en Taylor bannaði fyrirtækinu á sínum tíma að spila plötuna sína 1989. Samkvæmt Huffington Post er Katy sjálf ekki viss hvort Taylor láti sjá sig: „Það fer bara eftir því hvort hún sé upptekin,“ var haft eftir Katy Perry.

Deilur þeirra má rekja til lagsins Bad Blood sem Taylor samdi um Katy eftir að sú síðarnefnda átti að hafa stolið frá henni dönsurum. Katy gagnrýndi Taylor svo á Twitter og aftur eftir að Taylor lenti í deilum við söngkonuna Nicky Minaj.

Nú virðist sem svo að Taylor eigi við annan og stærri óvin að etja en rapparinn Kanye West lét hafa eftir sér slæm ummæli um Taylor. Sagði hann meðal annars í nýju lagi: „Ég gerði tíkina fræga“ og vitnar hann þar í atvik sem átti sér stað á VMA-verðlaunaafhendingunni þegar hann kom óvænt upp á svið þegar hún var að taka við verðlaunum. Sagði hann einnig að hann myndi sofa hjá henni einn daginn.

Talsmenn Swift hafa sagt ummæli West full af kvenhatri en Kanye hefur sjálfur sagt að hún eigi heiðurinn af textanum og að hann hafi verið saminn eftir að þau hafi rætt saman í síma í klukkutíma. Taylor hefur ekki svarað nýjasta útspili West.