Leikkonan Carrie Fisher segir frá því í endurminningum sínum að hún hafi átt í nokkurra mánaða ástarævintýri með Harrison Ford þegar þau léku saman í fyrstu Star Wars-myndinni fyrir ótal mörgum árum. Fisher var þá 19 ára og Ford, sem var kvæntur fyrstu eiginkonu sinni, var 33 ára gamall. Fisher segist nú hafa nokkra sektarkennd vegna þessarar uppljóstrunar.
Í skemmtiþætti Graham Norton sagði Fisher að það hefði komið henni á óvart hversu mikla athygli þessi uppljóstrun hennar hefði fengið og henni þyki það vandræðalegt. Fjölmiðlar hafi síðan búið til fréttir, eins og þær að hún hefði sagt að Ford hefði verið ómögulegur í rúminu, en það hefði hún aldrei sagt. Hún hafði samband við Ford þegar hún vann að endurminningum sínum og sagði honum að hún ætlaði þar að birta dagbókarbrot sem tengdust honum. Hann svaraði henni í gríni að hann myndi hafa samband við lögfræðing sinn.
Fisher og Ford hafa verið vinir í gegnum árin og unnu saman á síðasta ári í Star Wars – The Force Awakens. Fisher segir að góð vinátta þeirra geri að verkum að hún sé nú með sektarkennd yfir því að hafa sagt frá stuttu ástarsambandi þeirra. Hún sagðist vera viss um að hinn hlédrægi Ford væri alls ekki hrifinn af fréttaflutningi af málinu.
