Rod Stewart var aðlaður á dögunum af Vilhjálmi Bretaprins. Penny, eiginkona hans, mætti vitanlega með manni sínum til athafnarinnar og þar voru einnig synir þeirra tveir, tíu og fimm ára. Penny, sem nú kallast lafði Penny, er 45 ára fyrrverandi undirfatamódel, og hefur verið gift hinum 71 árs Stewart í níu ár. Lífið með honum er stundum einkennilegt, eins og kom fram í umfjöllun Sunday Times um hjónabandið.

Stewart og eiginkona búa vel og söngvarinn á til að ávarpa konu sína í gegnum hátalarakerfi á heimili þeirra. Þettta mun hann gera til að þurfa ekki að hrópa og kalla því hann vill vitanlega spara röddina. Penny eldar ekki og segir ástæðuna þá að matseld hennar standist ekki kröfur eiginmannsins. Hún segist eiga þrjú börn, synina tvo og Stewart, sem hún kallar elsta barnið sitt.

Í umfjölluninni kemur einnig fram að Stewart sé afar nískur og sem dæmi er tekið að hann keyrði eitt sinn 16 kílómetra leið til að láta leiðrétta reikning á veitingastað, en þar hafði hann verið rukkaður um vatnsflösku sem hann hafði ekki pantað. Hann fékk flöskuna endurgreidda.