Staðfest er að Hollywood stjarnan Ben Affleck mun koma hingað til Íslands seinna í mánuðinum eða í nóvember ásamt öðrum leikurum og tökuliði bandaríska stórmyndin Justice League. Þessu greindi Affleck sjálfur frá í bandaríska spjallþættinum Live with Kelly nú í morgun.
„Ég var að ljúka tökum. En ég þarf að fara aftur, ég er að fara til Íslands í nokkra daga, en ég var í London í fjóra mánuði,“ sagði leikarinn en tökum lauk í London um síðustu helgi.
Áður hafði verið gefið út að Hollywood leikarinn Jason Momoa myndi koma hingað til lands í tengslum við tökur myndarinnar. Fregnirnar af komu Afflexk ættu því að vera gleðitíðindi fyrir íslenska aðdáendur stjörnunnar.
[youtube https://www.youtube.com/watch?v=hOSrbmuORCg&w=600&h=374]
Tökur á Justice League eru fyrirhugaðar á Vestfjörðum þar sem Djúpavík mun leika aðalhlutverkið. 200 manna tökulið mun fljúga hingað til lands og þá hefur jafnframt verið tilkynnt að nokkrir af þekktustu leikurum Íslands muni fara með hlutverk í myndinni.
