Sóleyju Sif Eysteinsdóttur blöskraði mjög þegar hún heyrði af því bláókunnug kona hefði gert athugasemdir við holdafar móður hennar, Kristrúnar Nönnu Höjgaard Úlfarsdóttur. Ákvað hún því að svara konunni fullum hálsi.

Sóley birti því bréf á facebook þar sem hún ávarpaði hina ókunnugu konu og kemur hún þar móður sinni til varnar:

„Þetta er fyrir gelluna sem kallaði mömmu mína „feita“ í Bónus í dag. Mamma mín er ein duglegasta og æðislegasta manneskja sem ég þekki. Í dag þurfti mamma að fara útí búð til að kaupa súkkulaði og eithvað fyrir afmælisveisluna hjá systur minni og þegar hún er í röðinni kemur þú og segirhenni að þetta (draslið í körfunni) sé ástæðan fyrir því hún er svona feit.“

„Mamma mín er ekki feit! Hún hætti að borða sykur og hveiti fyrir tveimur árum og er búin að missa 35 kíló síðan hún fyrst byrjaði að létta sig.“

Með bréfinu birtir Sóley meðfylgjandi myndir sem sýna þær breytingar sem orðið á útliti móður hennar undanfarin misseri. Í samtali við DV.is segir Sóley að það hefði fokið í sig þegar móðir hennar kom heim úr búðarferðinni og sagði henni frá hinni illskeyttu athugasemd konunnar. Hún hafi í kjölfarið ákveðið að taka til sinna ráða. Þá segir hún móður sína vera algjöran nagla sem láti engan vaða yfir sig. Hún hafi þó áður fengið að heyra ónærgætnar athugasemdir frá fólki í gegnum tíðina. „Það gerðist oft þegar hún var sem feitust. Bæði var verið að stara og segja ýmislegt. Ef hún fór til dæmis í lyftu horfði fólk á burðargetu lyftunnar og reiknaði í huganum hvort lyftan þyldi þetta.“

Hún bætir við að þær mæðgur séu nánar vinkonur og hafi hún ætíð stutt móður sína eftir að hún ákvað að gera breytingu á lífstíl sínum. „Sem og við öll fjölskyldan.“