„Þetta var óneitanlega mikið sjokk,“ segir Klara Arnalds en hún varð fyrir þeirri óskemmtilegu reynslu í gærdag að barnavagn sem sonur hennar lá í festist hálfur inni í strætisvagni. Ók strætisvagninn síðan af stað og náði að keyra stutta vegalengd áður en farþegar gerðu vagnsstjóranum viðvart. Klara segist hafa fyllst skelfingu við að horfa upp á barnavagninn festast og dragast burt og þá hafi viðbrögð vagnstjórans svo sannarlega ekki verið til fyrirmyndar.

„Ég er ennþá að ná mér eftir þetta, segir Klara í samtali við DV.is en hún greindi frá atvikinu á Facebook síðu sinni í gær. „Þetta kom ansi illa við mömmuhjartað.“

„Við vorum sumsé á leið upp í strætó á Lækjartorgi, barnavagninn var kominn með tvö dekk upp í vagninn þegar hurðirnar allt í einu lokast, klemma vagninn í dyrunum og bílstjórinn keyrir af stað. Þeir farþegar sem sáu þetta voru sem betur fer fljótir að öskra á vagnstjórann að stoppa og drengurinn fór því ekki langt, en þó nógu langt til að fylla mig einni þeirri mestu skelfingu sem ég hef nokkurn tíma fundið fyrir,“ segir Klara í færslunni.

Hún segist enga ungri menntaskólastúlku, Birnu mikið að þakka en hún settist við hlið hennar í vagninum. „Hún spjallaði við mig alla leiðina og fór út einni stoppistöð síðar en hún ætlaði til þess eins að geta hjálpað mér út með vagninn. Þessi fröken er greinilega með hjarta úr gulli, og mér þótti verulega vænt um þetta,“ Klara jafnframt en hún kveðst hins vegar ekki ánægð með viðbrögð vagnstjórans sem hafi hvorki yrt á hana né beðist afsökunar.

Í samtali við DV.is segir Klara jafnframt að Jóhannes Rúnarsson, framkvæmdastjóri Strætó hafi fyrr í morgun haft samband við hana og beðist afsökunar á atvikinu. „Mér skilst að það sé búnaður í vögnunum sem komi í veg fyrir þetta en það hefur ekki virkað í þessu tilviki. Mér skilst líka að bílstjórinn muni fá tiltal. Mér var einnig boðin áfallahjálp sem ég að vísu þáði ekki en ég kunni virkilega að vera boðið það.“